تامر أمين يطالب بدراسة أسباب تكرار إصابات لاعبي الأهلي بالرباط الصليبي

طالب الإعلامي تامر أمين؛ بمعرف أسباب تعرض تكرار لاعبي الأهلي للإصابة بالرباط الصليبي مشيرا إلى أن الأمر يحتاج إلى دراسة.

وقال أمين خلال برنامج "أخر النهار" المذاع على قناة "النهار": "خبر عاجل مؤسف للغاية؛ رغم أننا فرحنا الصبح أن اللاعب الغاني يعقوبو عزيز البالغ من العمر 24 تجاوز الكشف الطبي وسيصبح رسميا لاعبا في النادي الأهلي ولا يتبقى إلا الإعلان الرسمي؛ الخبر العاجل أن الإصابة اللي كنا فاكرينها خفيفة وتعرض لها نجم النادي الأهلي والواعد هذا الموسم جدا كريم فؤاد مطلعتش خفيفة الإصابة طلعت لعينة".

وأضاف: "اتضح منذ قليل إصابة كريم فؤاد بقطع في الرباط الصليبي وصدر قرار بسفر اللاعب إلى النمسا الأسبوع القادم لاجراء جراحة الرباط الصليبي".

وأضاف: "أنا مش عارف أقولكم ايه عن موضوع الصليبي دة مع الأهلي؛ قصة الإصابات في الأهلي زادت وكترت وفاقت الحد؛ أنا عارف أن الإصابات قدرية قضاء وقدر ولكن لما تبقى الإصابات في الدوري العام 90% منها متركز في نادي واحد يبقي لازم تقف وتقلق؛ ولما 90% من الإصابات الـ90% تبقى كلها إصابات قوية ليها علاقة بأربطة الركبة يبقي لازم تقف وتقلق وتدرس".

وتابع: "هل التدريبات غلط هل الأحمال التدريبية غلط هل العضلات بتاعة اللاعبية دي مش متأسسة للحمل البدني؛ اشمعني اللاعيبة دي؟ داحنا فاضل دلوقتي مع النادي الأهلي للرياضة البدنية نعمل نادي مستشفى النمسا وعلى فكرة الفرقة كدة كاملة من مصطفى شوبير الموجود دلوقتي في النمسا لكريم فؤاد اللي مسافر أهو النمسا لأكرم توفيق اللي موجود في النمسا لعمار حمدي اللي لسة راجع من النمسا لمحمد محمود اللي راح النمسا مرتين".

وأوضح: "حاجة مش ممكن نعمل نادي مستشفى النمسا وننافس بيه في الدوري النمساوي وممكن ناخد ألقاب كمان؛ لازم يكون في وقفة مينفعش الجهاز الطبي يطلع كل شوية يقول تمت العملية بنجاح أحنا مش في مستشفى الدمرداش؛ دا نادي لما كل ربع ساعة نقول تمت العملية بنجاح يبقي لازم نعرف العملية تمت ليه والإصابة تمت ليه".

وأكمل: "في الطب الوقاية خير من العلاج فلو أنا أعرف أقى اللاعبين خطر التعرض للإصابات يبقي برافوا عليا وشاطر مش شطارتي بس أنهم يخدوا سكينة وبعدين أعالجهم لما الإصابات تتركز أوي كدة لازم أعرف ايه اللي حصل وايه اللي بيحصل".

واختتم: "كل أندية الدوري بتلعب على الملاعب اللي بيلعب عليها الأهلي؛ عشان قصة أرضية الملاعب؛ هل معني كدة المشكلة في الملعب اللي بيدرب عليه الأهلي بس ملعب التتش؛ هل الحمل التدريبي غلط لازم نعرف المشكلة أيه".