أحمد موسى يرد على أكاذيب الهارب محمود وهبة حول ديون مصر

أكد الإعلامي أحمد موسى؛ أن مصر لن تتخلف عن سداد التزاماتها الدولية، مشيرا إلى أن الدولة المصرية قادرة على سداد ديونها دون تأخير.

وقال موسى خلال برنامج "على مسؤوليتي" المذاع على قناة "صدى البلد": "إمبارح البنك المركزي أعلن أن الاحتياطي بتاعنا زاد وتجاوز الـ34 مليار دولار وسددنا في نوفمبر وديسمبر اللي فاتوا 2.5 مليار دولار من ديوننا الخارجية".

وأضاف: "كان بعض الكذابين بيقولوا مش هنعرف نسدد وهنعلن إفلاسنا؛ الواد الهربان اللي اسمه محمود وهبة اللي خد فلوس البنوك وقاعد في أمريكا قالك هيعلنوا الإفلاس عشان مش عارفين يسددوا؛ بنقولك يا محمود يا وهبة مصر لا يمكن تعلن إفلاسها".

وتابع: "مصر بتسدد وعليها كل الالتزامات بتسددها قولا واحدا؛ أنت نفسك يحصل دة مش هيحصل يا محمود يا وهبة؛ البنك المركزي سدد 2.5 مليار دولار من الديون اللي علينا وأعلن بشكل رسمي؛ يبقي أنت عندك دولار جاي".

وأكمل: "الناس بتسأل الدولار جاي منين؟ في عندك مصادر للدولار؛ في أشقائنا من الخليج بيدخلوا في حاجات وشراكة في حاجات وصناديق سيادية وبيدفعوا بالدولار وفي عوائد مهمة من قطاع السياحة دي فلوس جاهزة بتدخل مباشرة وعندنا الحمد لله الفترة دي اقبال سياحي".

وأوضح: "عندك قناة السويس يوميا في فلوس داخلة من قناة السويس؛ يوميا سفن بتعدي رايحة بورسعيد وسوف رايحة السويس؛ دول بيدفعوا فلوس داخل البنك المركزي عندك استثمارات خارجية وسندات دولية".

وواصل: "أيوة عندك دولار هو أنت سددت منين يعني؟ واللي جاي هتسدده ومش هتتأخر ولا ثانية؛ مصر لم تتأخر أبدا عن سنداتها الدولية والأهم من كل دة الأسعار والعيش والحاجة تنزل شويتين تلاتة؛ محتاجة الرقابة والانضباط والمواجهة الحاسمة مفيش حاجة تانية غير المواجهة لأي حد يرفع أسعار".

يذكر أن البنك المركزي المصري كان قد أعلن عن ارتفاع صافي الاحتياطي النقدي من العملات الأجنبية بنحو 500 مليون دولار  ليبلغ نحو 34 مليار دولار بنهاية شهر ديسمبر 2022، مقارنة بنحو33.5 مليار دولار خلال نوفمبر السابق له.

وأشار مصدر مصرفي مسؤول، إن مصر سددت مدفوعات مرتبطة بالمديونية الخارجية خلال شهر ديسمبر الماضي بلغت نحو مليار دولار، فيما كانت قد سددت نحو 1.5 مليار دولار في نوفمبر الذي سبقه، ليصل إجمالي سداد الالتزامات الخارجية إلى 2.5 مليار دولار في شهرين.