«الفن حرام».. أبرز تصريحات زيزي عادل المثيرة للجدل
ظهرت الفنانة المعتزلة زيزي عادل ضيفة ببرنامج “كلام الناس” الذي تقدمه الإعلامية ياسمين عز على شاشة قناة “mbc مصر”، وأدلت بعدة تصريحات عن الفن وبرنامج “ستار أكاديمي” الذي بدأت مسيرتها من خلاله، وأثارت تصريحاتها جدلا واسعا عبر مواقع التواصل الإجتماعي، أدت لتصدرها التريند خلال الساعات القليلة الماضية.
قالت الفنانة المعتزلة زيزي عادل أنها تركت الفن لأنه يحدث به أشياء خاطئة، وكل ما يحدث به حرام.
وأضافت: “الغناء فيه أسس لازم تتعمل علشان أكون مطربة منها إني أعمل فيديو كليب ويكون معايا موديل، وفي كذا حاجة غلط بتحصل، زي كلام الأغنية لأنه سواء فيه حب أو هجر أو عتاب وبيكون فيه تحريك للمشاعر، والفكرة كلها على بعضها حرام”.
تابعت نجمة ستار أكاديمي: “لما أطلع على الاستيدج لازم ألبس فستان وأتحرك مع المزيكا أكيد مش هقف تمثال، وكان فيه حاجة بتضايقني جدًا في الحفلات مش عندي قدرة ألغيها وأنها أن اللي حاضر بيصورني من زوايا زي ما هو عاوز وبيجيب من الحتة اللي عاوزاها ومش عندي الحق أقول له ما تصورش”.
أضافت: “أنا معرضة أني أتصور على كل موبايلات الناس.. وسألت نفسي ليه أكون متاحة لكل الناس وعلى كل التليفونات.. ليه ماكنش ست قاعدة في بيتي مش متاحة لكل الناس؟ وممكن كل الناس تتفرج على صوري فلقيت أني مش حابة أكون متاحة لكل الناس، وحابة أكون بتاعتي.. وطريقة لبسي اتغيرت وحاولت أكون محتشمة يمكن ناقصني الطرحة وبدعي ألبسها وحلو الواحد”.
كشفت كواليس ما دار في “ستار أكاديمي”
أكدت زيزي عادل، إن الزمان لو عاد بها لن تشارك في برنامج اكتشاف المواهب “ستار أكاديمي”، مشيرة إلى أنه لا يتناسب مع العادات والتقاليد الشرقية، وقالت: “لو رجع بيا الزمن أكيد مكنتش هروح برنامج ستار أكاديمي، عشان دلوقتي بعد تغيير فكري وتقربي من ربنا وكل اللي بيحصلي ده يخليني أقول إن كان فيه حاجات كتير مكنش المفروض أعملها، ولكن أنا من الناس اللي مبتندمش وبشوف إن كل حاجة حصلت في حياتي ليها ترتيب وكل حاجة ليها أسباب”.
لفتت: “تجربتي في ستار أكاديمي كانت هي بداية النجاح والانطلاقة، أنا نزلت من البرنامج مشهورة مع إني مكنش عندي أغنية ولا أي حاجة، ولكن كنت مشهورة كأني نجمة بقالي 10 سنين بغني، ولقيت عروض من شركات إنتاج كبيرة، ولما رجعت مصر مصدقتش عدد الناس اللي كانوا جايين يستقبلوني، لأن أنا قعدت هناك 4 شهور مفيش تليفزيون ومكنتش عارفة أنا معروفة برا ولا لأ، ولا أعرف كان بيتكتب عني أخبار ولا لأ ولما رجعت في صدمة بتحصل كده إني مشهورة والدنيا بتختلف”.
أردفت: “ستار أكاديمي كبرنامج فكرته لا تناسب تقاليد مجتمعنا، كان فيه كاميرات في كل مكان، حتى الحمامات كان فيها كاميرات عند المرايات، والموضوع ده كان بيضايق”.
كشفت حقيقة زواجها من داعية إسلامي
كشفت المطربة المعتزلة حقيقة زواجها من داعية إسلامي، والذي تسبب في اعتزالها الفن، مشيرة إلى أن ذلك غير صحيح، وقالت: “قالوا إني اتجوزت داعية وهو اللي أقنعني أعتزل وأنا معرفش ليه بيجوزوني كتير كدا، ودي بشرة خير ويا رب أتجوز بس دا مكنش حقيقي والاعتزال مكنش ليه علاقة بالارتباط أو الجواز”.
أضافت زيزي عادل: “قرار اعتزالي من عند الله، وحسيت كأنه بعتلي وقالي سيبي الفن وحاجة بتحصل بدون وصف وكأن ربنا بيقولي كفاية هزار تعالي بقى ونعمل للي جاي، ومش صح الست تتحجب عشان زوج لأنه هيكون عن عدم اقتناع”.
وعن رأيها في الزواج قالت: “أنا شايفة إننا نسيب الست تعمل اللي حاساه ولو عندك قابلية تسامحي الراجل لو ضايقك تمام، إنما مينفعش نقول لها لو عملك حاجة سيبيه وإوعي تتنازلي واتطلقي، ولو الراجل ضايقك واعتذر ارجعيله وبردو مينفعش تاخد فوق دماغها وتسكت وبمجرد ما يجي يقول أنا آسف ويجيب حاجة بسيطة بنرجع عادي وكل الناس عايشة كدا أنا مش بقول كلام من الفضاء، ولو كل حاجة هتاخديها على كرامتك البيوت هتتخرب”.
