أحمد موسى منفعلًا: "سندوتش الفول بـ 8 جنيه وقرص الطعمية المحشي رفاهية"
علق الإعلامي أحمد موسى على الارتفاع المبالغ فيه في أسعار السلع مشيرا إلى أن زيادة الأسعار طالت سلعا أساسية يستخدمها المواطن بشكل يومي.
وقال موسى خلال برنامج "على مسؤوليتي" المذاع على قناة "صدى البلد": "مصر فيها قري ونجوع وناس عايزة تعيش وتلاقي السلع موجودة؛ أستغرب أن النهاردة الطعمية والفول والكشري والأكلات الشعبية؛ قرص الطعمية اللي كان النهاردة بـ 50 قرش بقي بـ 2 جنيه قرص الطعمية المحشي بقي رفاهية ووصل أربعة جنيه".
وأضاف: "السندوتش النهاردة الفول أو الطعمية اللي كان بأربعة بقي بـ8 جنيه النهاردة؛ أنا بتكلم على أكلة شعبية هي أرخص حاجة في مصر؛ ازاي يعني؟ الحل عندي عند 140 ألف طن موجودين في الموانئ؛ أخلي الفول والطعمية والأكلة الشعبية ترتفع كدة وأنا عندي في الموانئ 140 ألف طن ما نفرج عنها ونشوف الموضوع".
وتابع: "ألاقي عربية الفول كان المواطن الصبح يصحي يقف على عربية الفول أديني أفطر انتوا عارفين لما غلي بقي بعشرة جنيه؛ النهاردة في أماكن الطلب وصل 17 وأماكن وصل 25 جنيه".
وأوضح: "علبة الكشري اللي كانت بـ 8-9-10 جنيه لما غليت أوي النهاردة بقيت من 20 وأنت طالع؛ كنت لما تروح تفطر أو تاكل في مطعم فول وطعمية في وسط البلد؛ تاكل فتطلب طلبات ويحطلك طبقين تلاتة أربعة طرشي النهاردة".
وأكمل: "النهاردة في مكان كدة بقولهم اسألولي على الأسعار؛ كيلو البن زاد 50 جنيه في الكيلو؛ الكبدة المستوردة كانت بـ65 جنيه الكيلو وصلت كان النهاردة 110-120 بديكم نماذج؛ العدس النهاردة انتوا عارفين بكام العدس؟ الكيلو أغلى من الفراخ وأغلى من البلطي؛ 50 جنيه العدس".
وأوضح: "ده يحتاج إيه؟ يحتاج أبدر البلد منافذ وشوادر وأحنا نشتغل منظومة الدولة والحكومة عندنا مبادرات بس أزود؛ ده شغلنا كلنا أكل الناس؛ المواطن ما يعنيه اليوم وبكره أكله؛ اللي بيدور عليه أكله وأنا بتكلم على أبسط شيء للمواطن بتكلم على فول وطعمية وكشري".
واختتم: "يستطيع المواطن أن بيتكلم وهو بيشتكي دا صوت المواطن وأنا بقول ياجماعة على الهواء مش في السر لا في العلن".
