أحمد موسى عن تصريحات الحكومة حول الأرز: "كلام وعلى الأرض مش موجود"
عبر الإعلامي أحمد موسى؛ عن استيائه من أزمة الأرز وارتفاع أسعاره مؤخرا مشيرا إلى أن الإجراءات التي اتخذتها الحكومة لاستلام الأرز من المزارعين لم تكن صحيحة.
وقال موسى خلال برنامج "على مسؤوليتي" المذاع على قناة "صدى البلد": ملف الناس؛ أي مسؤول بيطلع يقولك أحنا بلد بتزرع رز ومنتجة للرز وعندنا فائض 400 ألف طن عن احتياجاتنا؛ عندنا يبحث المواطن عن كيلو رز يبقي في مشكلة؛ أحنا بنقول الكلام عندنا فائض والمواطن اللي بيدور على كيلو رز وميلاقيهوش أو لاقاه يبقي كأنك بتديله هدية".
وأضاف: ""خدنا إجراءات وقرارات أدت لده وارد؛ احنا كنا بنشتغل كحكومة على أهالينا المزارعين مشكورين يسلمونا 1.5 مليون طن أرز؛ اتعمل حضراتكم وأنا هنا بقول للرأي العام عشان نعرف حجم المشكلة اللي احنا فيها وأنا مضطر أصارح الرأي العام بكل ما لدي".
وتابع: "لازم أحط الرأي العام أمام المشكلة وأقوله أه كان في حاجات غلط؛ طلع 11 قرار خلال شهرين الـ 11 قرار بدل مانا أستلم 1.5 مليون طن أرز استلمت 300 ألف طن فقط لا غير محدش هيطلع يقولك استلمت 1.5 مليون ولا مليون ولا نص مليون هما الـ 300 ألف طن فقط اللي استلمناهم".
وواصل: "هل القرارات اللي عملتها عشان تنظم مسألة استلام الأرز كانت قرارات تجيب النتيجة والا ليها تأثير سلبي؟ الإجابة كان لها تأثير سلبي بشكل واضح بدليل لم تحقق الهدف منها".
وأكمل: "لو أنا في كفر الشيخ أو الدقهلية أو البحيرة وجالي قرار بيقولي لو سمحت سلمني طن الرز بـ 6500 ياباشا لما أخدت القرار حسبت الطن دة تكاليفه كام؟ تكاليفة أربعة خمسة سبعة؛ حسبتها ازاي؟ اتقال أديني الأرز بـ 6500 قول سبعة في حين أن برة بتسعة".
وأوضح: "يعني أنا كمزارع زرعت وتعبت وشقيت؛ وتقولي أنا هستلمه منك بكذا؛ في حين لو بعته برة هبيع بـ8-9 تفتكر دة السعر العادل؟ الإجابة لا لو كان السعر العادل كان المزارع هيجري عليك؛ أنا مدتش سعر عادل للمزارع فالمزارع مجاليش وحتى لو قلت للمزارع مش هديلك سماد ومش هتزرع تاني وهخده منك وهحاكمك مجاش بردو".
واختتم: "اللي أنا بقوله دة هيزعل ناس كتير بس اللي يعنيني المزارع والمواطن؛ أنه ينزل يلاقي الرز مش يستخبي الرز داحنا طول عمرنا الرز عندنا بيترمي أنزل خد اللي أنت عايزه؛ طيب دور النهاردة مش بتقول عندنا اكتفاء؟ هو كلام وعلى الأرض مش موجود ولما تروح يقولك هما اتنين كيلو والسايب حاجة والمغلف حاجة تانية والحكومة حطت سعر 18؛ الطلعة دي ليه ما كان بعشرة والنهاردة بـ23 لو لقيته؛ الدايرة دي فيها حاجة غلط".
