أحمد موسى يطالب بتطبيق إجراءات استثنائية لضبط الأسعار
طالب الإعلامي أحمد موسى؛ الحكومة بتطبيق إجراءات استثنائية من أجل ضبط الأسعار، مشيرا إلى أن الأسعار ترتفع بشكل يومي في الأسواق دون مبرر.
وقال موسى خلال برنامج "على مسؤوليتي" المذاع على قناة "صدى البلد": "من كام يوم قالتلنا الحكومة أن الرز سلعة استراتيجية؛ سؤالي هل الفراخ والبيض والقمح سلعة استراتيجية أو لا؟ عندنا 10-15 سلعة استراتيجية ايه المشكلة أن تتاخد قرار أن السلع دي استراتيجية ايه المشكلة لأن في ناس تتكسب من الأزمات في ناس تنتظر تحدث أزمة عشان يكسب".
وأضاف: "أنا كحكومة وجهات رقابية ودولة دوري أبقى شايف المواطن يطلع المواطن يقول الحقونا الأسعار؛ كل حاجة بتزيد أنا كدولة أو كحكومة بسمع المواطن بيقول كدة وأنتظر يوم وأسبوع وشهر وبعدين أقول هتبقى سلع كذا؛ ليه مقولش من بدري؟ مافي مواطن في الـ 100 مليون لا يتحدث عن الأسعار".
وتابع: "السعر في المكان الفلاني حاجة والمكان اللي جنبه حاجة تانية؛ السوق الفلاني السعر هناك حاجة واللي جنبه حاجة تانية لا يمكن تلاقي حاجة على مستوى الجمهورية سعرها واحد أمر غريب ومريب في بلد بتكلم على أزمة وبتقول إن أنا هتابع وأراقب".
وواصل: "أتابع وأراقب وكل واحد بيتحكم في المواطن من الكبير التاجر إلى البقال الصغير من اللي بيبيع كرتونة بيض إلى اللي عنده مزرعة فراخ؛ يتحكم في المواطن لازم ياجماعة يبقي عندي اجراء محدد أحنا في ظرف استثنائي والظروف الاستثنائية لازم تاخد إجراءات استثنائية".
وأكمل: "الحكومة لازم دورها المواطن والأسعار وضبط أداء السوق دا دور الحكومة والمحافظين والجهات الرقابية والمواطن مش هينزل يتخانق كل يوم؛ في سلعة معينة واحد حجزها وتاني يوم راح يشتريها لقاها زدات رقم؛ كله بيغلي بدون استثناء مين بيحدد سعر؟ المواطن ليه يلف حوالين نفسه ليه أسيب المواطن يتباع ويشتري فيه كل يوم".
وأوضح: "سلع بأسعار؛ دائما نقول الضرب بيد من حديد امتى اليد من حديد؟ إذا مكانتش النهاردة أمتي أن شاء الله؟ هو في دولة النهاردة عندها الحاجة بتتسعر 7-8-10 مرات؛ بيقولك سوق حر لا مش سوق حر؛ إيه هو السوق الحر؟ أتاجر بالمواطن؟ سوق حر لما يبقى عندي ناس بتاخد هامش ربح مش عندي جشع؛ لما يبقي عندي جشع ميبقاش سوق حر وفي غياب الحساب والرقابة وفي غياب إجراءات كثيرة لازم كانت تتاخد من بدري".
واختتم: "ياما الحكومة طلعت اتكلمت والمنظمات الدولية اتكلمت عن الأسعار؛ أنا هعمل ايه هقعد أتفرج؟ المواطن غلبان محتاج نديله دعم وأقف معاه أكتر؛ السلع الاستراتيجية لازم تدخل فوري من الدولة؛ أنا عملت الرز سلعة استراتيجية والزيت سلعة أخبارها اية؟ دا احنا كله بنستورده من برة".
