أحمد موسى: "مصر لجأت لصندوق النقد 11 مرة وفي دول بيترفض طلباتها"
أكد الإعلامي أحمد موسى؛ أن مصر توجهت إلى صندوق النقد الدولي 11 مرة منذ إنشائه، مشيرا إلى أن التعاون مع الصندوق لم يحدث خلال فترة حكم الرئيس عبد الفتاح السيسي فقط.
وقال موسى خلال برنامج "على مسؤوليتي" المذاع على قناة "صدى البلد": "11 مرة تذهب مصر إلى صندوق النقد الدولي؛ هل الأمر معتاد في عهد الرئيس عبد الفتاح السيسي فقط؟ مصر ذهبت مرتين في عهد الرئيس عبد الناصر مرتين في عهد الرئيس السادات وأربعة مرات في عهد الرئيس مبارك وثلاث مرات من 2016 وحتى الآن".
وأضاف: "مش أول مرة ولا آخر مرة؛ إحنا زينا زي غيرنا كتير أوي دول عانت واقتصادها عانى والنهاردة بنضرب بيها الأمثال زي اليونان وكوريا الجنوبية والبرازيل والأرجنتين عندهم التضخم وصل 100%".
وتابع: "صندوق النقد الدول تلجأ له لأن أنت مشارك؛ تم تأسيس الصندوق في سنة 1944 ومصر انضمت سنة 1945 ودفعنا الحصة الخاصة بينا وأكبر مساهم في الصندوق هي الولايات المتحدة بنسبة 17%".
وأوضح: "الصندوق النهاردة قالنا ادينا مصر 3 مليار دولار في ناس شايفاه عظيم وناس شايفاه مش عظيم؛ أيه تأثيرات القرض علينا كمواطنين؛ طيب التلاتة مليار دول لوحدهم والا في تمويلات أخرى؟ في تمويلات أخرى إضافية بـ 14 مليار دولار".
وواصل: "في دول بتلجأ للصندوق والصندوق بيرفض؛ النهاردة الصندوق رفض طلب احدى الدول وقال إنه هيأجلها السنة الجاية أنا مش راجل اقتصاد والموضوع مش محتاج الناس تفتي فيه مجلس الوزراء بيجاوب النهاردة في تقرير من 50 سؤال عن كل الأسئلة الخاصة بالموضوع ومجلس الوزراء مش بيجاوب بمزاجه دا بيقول الحقائق وبيأكد حكايتنا مع صندوق النقد من أول مرة كانت في عهد الرئيس عبد الناصر لغاية النهاردة".
واختتم: "في ناس تقولك مش محتاجين الصندوق وفي ناس تقولك لا والله أحنا واخدين القرض عشان ظروف؛ والناس كلها بقت النهاردة تحلل مع نفسها أكتر من المحللين نفسهم؛ الناس بقت عارفة بكره أيه وبعده؛ عارفين السر فين من الأخر يعني؟ الاستيراد دي كلمة السر اللي احنا مش قادرين نقتنع بيها".
