عمرو أديب للتجار: "لما تحاسبني على الدولار بـ 32 جنيه ده كفر"
عبر الإعلامي عمرو أديب؛ عن دهشته من قيام المستوردين والتجار بزيادة أسعار السلع بعد حساب الدولار بقيمة 32 جنيها رغم أنهم يحصلون عليه من البنوك بسعر 24.75 جنيه.
وقال أديب خلال برنامج "الحكاية" المذاع على قناة "أم بي سي مصر": "الناس اللي بتاخد الدولار من البنك بـ 24.5 ليه بتحاسب الناس على 30؟ ده كفر في حد ذاته أنا أفهم الراجل اللي معاهوش دولار بيقول أنا بشتريه بالغلا؛ طيب التجار المفتريين اللي خدوا الدولار من البنوك ليه بيبيع السلعة بـ 30-32 وتلاقيهم بيصوتوا؛ طيب أنت واخده بكام؟".
وأضاف: "أنت بتاخد الدولار بـ 24.75 بتحاسبني بـ 30-32 ليه ؟ هي مركبة أزمة دولار وضمير وفكر وتفكير خارج الصندوق وفي حد خد قرار غلط وورطنا فيها من فبراير".
وتابع: "هنعمل ايه؟ علشان بس الناس قاعدة تقول الحق الصندوق والحق البنك المركزي كل دة مش هيعمل حاجة المسؤولين في البلد عارفيين ازاي تجيب خمسة ستة مليار مبلغ على بعضة وتدخل البضائع في الجمارك وهوب الأسعار تنزل.
وواصل: "الدولار من غير تعويم بيزيد جوة البنك كل يوم بدل ما يتغير في يومين تلاتة بيتغير في شهر كان واحد بيشتري بالدولار من البنك وكان بيجي من برة؟ طيب الدولار من برة دة ممين؟ أنت بيجي وقت والدنيا تتوقف تماما بقي لا قادر أشتري الدولار بالسعر دة ولا المواطن يقدر يشتري بالسعر دة والحاجة هتقعد بقي المبالغة في الزيادة في النهاية البضاعة هتقعد؛ المنفعة الحدية بقي للنقود".
وأكمل: "النهاردة مستنيين قرار صندوق النقد والنهاردة بيقولوا ممكن ناخد الـ 750 مليون دولار دول وبتاع ولكن مش هو ده الحل احنا محتاجين حلول جذرية".
وأوضح: "هو الدولار هيبقي بكام؟ اتحدث عن الدولار جوة البنك مبتكلمش عن الدولار اللي برة؛ هيفضل بـ24.75 والا هيزيد؛ الأهم الدولار بقي بـ25 -26 -27 هو في دولار؟ هو يبقي بكام دة موضوع مبفهمش فيه أنا بسألك هتقدر توفر دولار؟".
وذكر: "احنا عندنا من 5-6 مليار دولار بضاعة في الموانئ محتاجين ندخلها عشان الأسعار تنزل؛ لقيت ناس كتير مستنية اجتماع صندوق النقد الدولي والبنك المركزي لكن دول مش الحل؛ أنت محتاج رقم كبير الرقم دة هتقدر تجيبه؟ هتجيبه ازاي؟".
واختتم: "بسأل ناس وبكلم ناس الفلوس تيجي ازاي؟ ملهاش غير طريق واحد علشان تقدر تمشي الدنيا؛ الدولار بقي بكذا وجوة البنك بكذا؟ دا العادل محدش عارف؟ هتعرف ازاي لو دخلت البضاعة اللي برة العلف ينزل والجبنة تنزل والعربيات تنزل".
