مصطفى بكري: المتعاملون في السوق السوداء للعملة الأجنبية يهدمون الوطن

أكد الإعلامي مصطفى بكري؛ أن المتعاملين في السوق السوداء للعملة الأجنبية يقومون بهدم الوطن، مشيرا إلى أن تحقيق مكسب قريب حاليا من بيع العملة سوف ينعكس على اقتصاد البلاد بشكل عام.

وقال بكري خلال برنامج "حقائق وأسرار" المذاع على قناة "صدى البلد": "أنت ممكن تكسب في الألف دولار 20-30 ألف جنيه ولازم تعرف أن الـ 20-30 ألف جنيه دول معول الهدم اللي بتهد بيه وطنك أنت بتساعد في نمو السوق السوداء وأن دولارات العاملين بالخارج اللي مصدر هام للاقتصاد القومي بتروح لحته تانية والحتة التانية ليس لها هدف ألا أما اكتناز الثروات على حساب الوطن أو أنها بتضرب معول في جدار هذا الوطن".

وأضاف: "الدولة بتحاول وتجاهد قد ايه عشان نمضي إلى الأمام أوعى حد يفتكر أن رئيس الدولة راضي عن اللي بيحصل أو بيساعد في دة في مؤامرات بتقودها دول وجماعات وعصابات ومافيات وفي أساليب غلط بتم واحنا عايزين نرشد دة".

وتابع: "احنا مش عايزين نبكي على اللبن المسكوب ونقعد نقول ونشد في شعرنا ونسيب بلدنا تقع مننا؛ البلد دي بلد العزة والكرامة بلدك وبلدي وبلد الأجيال القادمة متفرحش بالقرشين اللي بتخدهم أنت تزعل على وضع بلدك وتساند تبني طوبة في هذا الجدار العظيم اللي عمرة ما هيتهد".

وأكمل: "الناس محتقنة في الشارع بشكل غريب عشان نبقى واضحين؛ وعلى الكل أنه يعرف دة ومحدش يكلمني بأعصاب باردة؛ أي حد بيتكاسل أو مبيقولش الحقيقة أو بيساعد في ترويج اشاعات تضرب الاقتصاد القومي لازم يعرف أن زيه زي أعداء الوطن".

وواصل: "البلد دي عايزة اللي يقف معاها؛ جيشنا العظيم اللي حمي البلد دي وشرطتنا الباسلة اللي قدمت تضحيات كبيرة جدا لا يمكن أن تقبل أن بعض العصابات والفسدة ينزلوا يستهدفوا اقتصاد الوطن".

وأكمل: "أنت مش عاجبك المنصب روح وأي حد متكاسل أو متأمر أو بيستغل الجو الحال لتحقيق أكبرمكاسب على حساب مستقبل البلد؛ أنت فشلت في كل حاجة فشلت بعناصر الإرهاب اللي حاولت تدمر البلد دي؛ البلد اللي كانت مليانة بالعصابات الإرهابية حصلت على الأمن والاستقرار".

واختتم: "انتقلنا من حالة إلى حالة منجيش بقي بإيدينا نساعد على عدم بلدنا عشان بعض الطماعين اللي بيحاولوا يمتصوا دم البلد دي عن طريق أنه يتاجر في الدولار برة الكلام دة مينفعش وهندفع تمنه كلنا".