إبراهيم عيسى يطالب الحكومة بالاعتراف بـ"أخطائها"
طالب الإعلامي إبراهيم عيسى، الحكومة المصرية بالاعتراف بالأخطاء التي ارتكبتها خلال الفترة الماضية مشيرا إلى أن هناك بعض التصرفات التي ساهمت في تفاقم الأزمة الاقتصادية الحالية.
وقال عيسى خلال برنامج "حديث القاهرة" المذاع على قناة "القاهرة والناس": "أجهزة الدولة والحكومة تحديدا مطالبة بالتواضع الشديد والتواضع الأشد والاحتواء والانصات واللي أنا مشفتوش في الحكومة على الإطلاق ولا مصدر في الحكومة ولا مسؤول ولا بيان بما فيها بيانات السيد رئيس الوزراء".
وأضاف: "ولا حاجة من دي خالص أن الحكومة اعترفت بأي خطأ خلال الفترة الأخيرة وعندها غرام شديد بأن الأزمة دي كلها ملهاش يد فيها كأنها هبطت من السماء مفيش أي قرار أو اجراء خده وزير المالية كان وحش ولا في أي اجراء خده وزير التموين كان خطأ ولا في أي اجراء خده وزير الزراعة كان عمل أزمة ولا أي حاجة خالص".
وتابع: "الناس لم تخطئ ولم يأتيها الباطل من بين يديها ولا من خلفها؛ دا اسمه كلام؟ ومقالوش مرة كدة عفوا أن احنا تصرفنا بما لدينا من معلومات وخطط وفي حاجات أصابها النجاح وحاجات أصابها الفشل واخطأنا التقدير؛ مفيش أخطأنا التقدير دي أبدا".
وواصل: "مش مهم دا مش دا موضوعنا وإن كان دة يتبني عليه؛ لو الحكومة شغالة دلوقت أنها مغلطتش خالص وأن الأزمة دي ملهاش أي دور فيها يبقي أحنا مش هنحل حاجة؛ لو الحكومة متصورة أنها مغلطتش خالص في الاعتماد على الأموال الساخنة أو اتساع القروض والديون".
وأوضح: "خلينا نقول مش هنعترف أن احنا غلطنا ولكن والنبي بينكم وبين بعضكم ياريت تبقوا عارفين أنكم غلطوا عشان نبني على اللي بيحصل دة؛ مش بالضرورة أن كل اللي عملناه دة مع سلامة النية واخلاصنا والمشروعات الرائعة اللي حصلت ألا أن في قرارات اتاخدت وأولويات اتعملت غلط أدت إلى تفاقم الازمة؛ التصور إننا لم نخطئ على الإطلاق طيب واحنا في أزمة زي اللي احنا فيها دي طيب تيجي ازاي؟".
واختتم: "في حته معصلجة هنا اللي هي الإخوان؛ أي نقد أو معارضة بتظهر من أي طرف الحكومة بترجمها أن دة يخدم الإخوان وبيصب في صالح الإخوان؛ يدعكوا الإخوان هو الإخوان اللي هيحددوا أجندة المجتمع؟ نقول إيه ومنقولش ايه؟ عشان أصل الاخوان مايتحرقوا الاخوان؛ جماعة غير وطنية ومأجورة وبندقية للإيجار".
