طارق الشيخ يوضح رأيه في أغاني المهرجانات: "مفيهاش مزيكا"

كشف المطرب الشعبي طارق الشيخ عن رأيه في أغاني المهرجانات التي انتشرت خلال السنوات الماضية مشيرا إلى أن هذا اللون من الغناء لا يحتوي على موسيقي.

وقال الشيخ خلال برنامج "يحدث في مصر" المذاع على قناة "أم بي سي مصر": "اللي بيسمع بيسمع؛ أنا مطمن أن عندي السميعة بتوعي وربنا بيكرمني بسميعة زيادة؛ اللي متعود يسمع بيسمع واللي متعود على مود تاني بيتعود ولكن بيجيله وقت يزهق من المود دة؛ أنا بسميها دوشة واللي حوالينا دة كله دوشة".

وأضاف: "الكلمة أساس كل حاجة وأنا مع أي لون يقول أي حاجة؛ بس حافظ على الكلمة لأن الكلمة بتدخل بيوت ناس؛ احنا متعودين على دة من أيام شريط الكاسيت؛ زمان كان شريط واحد بيتسمع للبيت كله".

وعن رأيه في أغاني المهرجانات قال الشيخ: "ساعات اللي عنده 16-17 سنة يقعد مع حد عنده 40 سنة وبيسمع حاجات تشبك فيه؛ لون المهرجانات مفيهوش مزيكا؛ كل المزيكا دي مقتبسة؛ كل واحد بياخد تيمة معينة ويركب عليها كلام مش حاجة هو مبدع فيها أو شقيان فيها من عنده".

وحققت أغاني المهرجانات نجاحا كبيرا بين أوساط الشباب وفي الوقت نفسه فجرت الكثير من الجدل ما بين مطالبات بمنعها أو تقنينها ومنح مطربيها تراخيص للغناء.

وكان الفنان مصطفى كامل نقيب المهن الموسيقية قد اجتمع مع مطربي المهرجانات خلال الفترة الماضية وقام بالاتفاق معهم على مجموعة من القواعد من أجل السماح لهم بالعمل دون عقبات.

وحضر الاجتماع عدد كبير من مطربين المهرجانات، مثل حمو بيكا، شحتة كاريكا، أورتيجا، عنبة، عصام صاصا، وغيرهم من المغنيين.

ومنح كامل عدد من مطربي المهرجانات تصاريح من أجل العمل فيما شدد عليهم بالغناء ضمن فرقه موسيقية تضم عازفين بالإضافة إلى انتقاء كلمات الأغاني وعدم تقديم كلمات خارجية تخدش الزوق العام.

كما شدد نقيب المهن الموسيقية على مطربي المهرجانات بالالتزام بكافة القواعد المتفق عليها خلال الاجتماع مع التأكيد على العقوبات المقررة وفقا للوائح حال وجود مخالفات وهو الأمر الذي أقره كافة مطربي المهرجانات الذين حضروا الاجتماع.