عمرو أديب عن ارتفاع الأسعار: "كيلو اللحمة بقى استثمار ومتتاكلش"
عبر الإعلامي عمرو أديب، عن دهشته من قيام بعض التجار من تقليل جودة السلع المباعة رغم زيادة الأسعار، مشيرا إلى أن جودة بعض المنتجات تدهورت بشكل لافت.
وقال أديب خلال برنامج "الحكاية" المذاع على قناة "أم بي سي مصر" في رسالة للتجار: "طيب ياجماعة أنت غليت الحاجة ظروف بقي والحياة والحرب؛ الحاجة ليه وحشة؟ ليه مستوى الأشياء تدهور وليه حجم الأشياء صغر؟".
وأضاف: "ليه الحاجة حجمها صغر ليه الجودة بتاعة الأشياء بقت مش كويسة؟ ليه في متاجر تاريخ الصلاحية فيها قريب جدا؟ دعوني أضرب مثالا بسيطا؛ أنا بحب أكل فول وطعمية سندوتشات من يومين بعت أجيب من المحل اللي متعود أجيب منه وقالولي مش موجود هات من اللي جنبه هات من اللي جنبه عايز واحد فول وواحد طعمية ومخلل".
وتابع: "عايز مخلل بفلوس؛ علبة المخلل متقطع فيها ربع جزرة وحاجة شكلها فلفل حراق؛ قرن فلفل قد عقلة الصباع دة المخلل؛ أفتح سندوتش الفول وأفتح سندوتش الطعمية تمشي كتير جوة السندوتش لحد ما تلاقي الحشو؛ فين الطعمية؟ الطعمياية صغرت جدا".
وأكمل: "السندوتش مفيهوش حاجة وبكام؛ ايه الفكرة يا جماعة؟ ودلوقت عاملين حاجة لطيفة حجم صغير وحجم كبير من أمتي والفول والطعمية فيها حجم صغير وحجم كبير؟".
وأوضح: "ناس كتير دلوقت بتعاني أن كرتونة البيض في جزء منها بايظ؟ وفي النص في اتنين صغيرين وبتاع؛ طيب والبايظ تيجي تفتحها تروح نازلة كلها صفار طيب مانا دافع؟ أنت ليه واخد مني فلوس زيادة؛ تاخد مني فلوس زيادة وبتديني حاجة بايظة".
وواصل: "نفس الشيء الناس بتشتكي من الرز؛ نسبة الكسر في الرز معروفة؛ أنا بتكلم عن السوق في اسكندرية وأسوان الكسر في الرز كتير والطعم مختلف".
وذكر: "ناس كتير بقت تقلل من استهلاك اللحوم والدواجن؛ بعد ما كان بياكل عدد من المرات بقي في مرات معينة بيجيب فيها اللحوم والدواجن؛ المأساة الحقيقة أن أنا اليوم اللي اروح اشتري فيه حته لحمة تبقى سيئة جدا؛ دا كيلو اللحمة بقي استثمار".
واختتم: "وروغم ارتفاع الأسعار تيجي تاكل اللحمة لا بتستوي ولا ليها طعم؛ أنت قلتلي العلف زيادة والسماد وبتاع ايه اللي حصل؟".
