محمد الباز يطالب بحساب المسؤولين عن كرة القدم: "تربحوا مليارات من ورا مصر"

طالب الإعلامي محمد الباز بمحاسبة كل من تسبب في تراجع كرة القدم المصرية إلى مستوى متدني، مشيرا إلى أن بعضهم تربح المليارات من وراء العمل في مجال الرياضة.

وقال الباز خلال برنامج "أخر النهار" المذاع على قناة "النهار": "النهاردة الكابتن محمود الخطيب رئيس مجلس إدارة النادي الأهلي كان بيتكلم في الاحتفال بتقديم الراعي الثالث للأهلي والحقيقة قال بعد تهنئته للمغرب ولقطر على التنظيم؛ يجب أن نعيد حساباتنا في مصر لأن مصر تستحق مكانة كبيرة جدا في ظل وجود دعم من الرئيس عبد الفتاح السيسي".

وأضاف: "الخطيب بيلخص الحكاية وبيشير للأزمة والمشكلة وأي حد بيحب البلد لازم يتوقف ولازم يسأل نفسه ويقول هو ايه اللي بيحصل؟ الخطيب بيقول يجب أن نعيد حساباتنا في مصر ودا يستدعي أن الجماعة المسؤولين عن الكرة في اتحاد الكرة وأي حد بيدير منظومة الكرة في مصر عندهم حسابات؛ احنا الأول يا كابتن بيبو نعرف الحسابات ايه عشان لما نعيد الحسابات نبقى عارفين".

وتابع: "الخطيب بيتكلم بصوت الوعي أننا محتاجين نعيد حساباتنا مرة تانية أنا مش هقول زي محمود الخطيب ولكن أنا بقول احنا نفتح الحسابات؛ الناس اللي شغالين في ملف الكرة دول ناس تربحوا على حساب البلد وتعاملوا مع البلد على أنها سبوبة وحققوا ملايين ويمكن مليارات من ورا السبوبة اللي اسمها مصر؛ أنا بطالب بفتح الحسابات؛ تتفتح الدفاتر القديمة ونشوف مين اللي وصل منظومة الكرة في مصر إلى هذا المستوى المتدني".

وأوضح: "لراجل مدرب المغرب ده لو بتكلم بياخد كام؛ مبياخدش 10% من اللي بيخده المدرب الأجنبي اللي بنجيبه للمنتخب بتاعنا؛ مصر حتى تحقق نتيجة مماثلة للي المغرب عملتها على الأقل مفروض تنهي زمن السماسرة في الكرة المصرية؛ في سماسرة والسمسار ده أهم حاجة مصلحته طيب نفوز أو لا مش مشكلة طيب يبقي عندنا فريق أو بطولات مش مهم هو خد عرقه من الحكاية وخلاص".

وأكمل: "اللي غلط في البلد دي لازم يتحاسب؛ كون أنك تفشل في حاجة زي كدة دا معناه أن في فساد في الإدارة؛ فاكرين اللي حصل في المونديال اللي فات وقالك لجنة تقصى حقائق ونشوف مين السبب ومحصلش حاجة وكل مرة مبيحصلش حاجة والمردي مفيش حاجة حاصلة بس قدامك درس يخليك تتأكد أنك فشلت بفعل فاعل".

واختتم: "في أيادي خربت الرياضة المصرية الناس دي يجوا حتى لو كان بأثر رجعي؛ ويبقي دة انطلاقة للي الكابتن محمود الخطيب قال عليه أن نعيد حساباتنا مرة أخرى".