محمد الباز يفتح النار على اتحاد الكرة: "هي كل حاجة بقت سبوبة؟"
هاجم الإعلامي محمد الباز؛ المسؤولين عن كرة القدم في مصر مشيرا إلى أنهم فشلوا خلال إدارتهم للعبة في تحقيق أي نتائج جيدة.
وقال الباز خلال برنامج "أخر النهار" المذاع على قناة "النهار": "أنا مش عايز أنكد علينا بهذه الفرحة الحقيقة وشفت ناس بتبيع علم المغرب في مصر وشفت احتفالات بعلم مصر والمغرب لأننا بنتكلم عن لحظة انتصار حقيقة؛ ياجماعة الانتصار في أي مجال والفرحة في أي مجال والانجاز في أي مجال".
وأضاف: "مش معني انتصار فريق في بطولة زي دي دا مش مجرد فريق بيلعب دا بيقولك في منظومة احترافية وراه؛ لكن لازم ننكد على نفسنا هو أحنا فين؟ مصر باسمها وامكانياتها وتاريخها وخبراتها المتراكمة أحنا فين؟ النهاردة لما يبقي فريق المغرب بيحقق الانتصار أنت بتفرحلة أكيد ولكن بتغير".
وتابع: "معرفش الناس بتوع الكورة عندنا عندهم دم والا لا الناس المسؤولين عن الاتحاد وبيجيبوا المدربين من برة وبيعملوا الصفقات حاسين بايه؟ سؤال مشروع جدا نفسي اسأله لكل الناس المسؤولين عن الكورة في مصر واللي بيلعبوا ويدربوا يعني مؤكد بيعرفوا يبصوا لنفسهم في المراية؟ بيناموا مستريحين الناس بتوع اتحاد الكرة دول؟ دي فكرة جات على دماغي في عز فرحتي لفريق المغرب لأن دة انتصار حقيقي ".
وأكمل: "دا سؤال احنا لازم نشتغل عليه بتكلم عن فريق عربي اشتغل واتدرب واتجهز وظهر إلى نص النهائي أي حد جات في دماغه أي فكرة أو سأل نفسه سؤال أو قال احنا ليه مبنحققش نتائج أو ليه دا مستوى الكرة عندنا؟ مين المسؤول يا جماعة لأن دي حاجة تزعل وحاجة تخليك تبص كدة حالة الاستسهال والاستهتار الموجودة عندنا في مصر لازم تنتهي".
وأوضح: "هل الأمور كلها بقت سبوبة في مصر؟ بتوع الكرة سبوبة وبتوع أي حاجة كل حاجة بقت سبوبة والحكاية كدة ضايعة؛ في اللحظة اللي انت فرحان بيها للمغرب والنتيجة اللي حققوها دور بقي على الناس اللي وصلونا لكده واحنا لو متحاسبناش دلوقت هتنحاسب امتي؟".
واختتم: "الوقت دة مش وقت محاسبة؟ مهو في فرق أهو في نفس منطقتك ونفس ظروفك بتحقق نتيجة وأنت على رأي انتوا عارفين الله يمسيه بالخير محمد هنيدي في سور الصين العظيم وأنا عاملة نفسي نايمة؛ الاتحاد بتاعنا النهاردة لما تيجي تسأله فين يقولك وأنا عاملة نفسي نايمة".
