عمرو أديب: "القيمة اللي حطاها الدولة هتبتدي تجري ورا سعر الدولار برة"
أكد الإعلامي عمرو أديب؛ أن الدولة يجب أن تتلقى الصدمات الاقتصادية الناتجة عن الوضع الحالي لحماية الفئات غير القادرة والفقراء.
وقال أديب خلال برنامج "الحكاية" المذاع على قناة "أم بي سي مصر": "أنا هاممني التزام الدولة بالحفاظ على مستوى جيد للحياة للفقراء في مصر والطبقات غير القادرة أنا لا فارق معايا الدهب بكام ولا الدولار ولا العربيات أنا أرى الأولوية الأولى للحكومة المصرية أنه يلتزم بمستوى الحياة المقبول".
وأضاف: "طبعا في ألم ومشاكل ولكن تقليل هذا الألم على الفقراء وبعد كدة ربنا معانا؛ الدولار في 2016 قفز ثم عاد؛ هل سيعود؟ معرفش هذا الأمر منوط بسياسات الدولة وسياسات المركزي؛ هيعملوا ايه وكيف يحركوا أوراقهم؟ أنت هتعمل ايه هل هتزود الفوايد؟ طيب لما تزيد تاني الإقراض هيوصل كام".
وتابع: "لو سبت الجنيه لقوته هيبقي بكام هل لازم نسمع كلام الصندوق هل في اختيارات هل البضائع في الموانئ دي هتخرج بسرعة في تقديري ممكن بضائع بـ 3 مليار تطلع والباقي حاجات ممكن جدولتها".
وأوضح: "مش عايز حد يقولي هو مفيش أخبار كويسة؟ لا في أزمة في البلد وكل العالم بيتكلم عنا ماعدا احنا ولازم الناس تبقى عارفة ايه اللي هيجرا ويجب أن قبل ما تاخد اجراء إذا اتخذت اجراء أن الناس تبقى معاك جزء من ارتفاع الأشياء أن في ناس بتقول الدولار بـ 32 أو بـ 31 طيب مين قال؟ طيب ليه مش بـ 30؟ السوق متساب للقولان وأنت بتوصل لمرحلة أن القيمة اللي حاططها كدولة هتبتدي تجري ورا السعر اللي برة".
وأكمل: "دائما متعودين اللي بره يبقي أكتر نص جنيه أو جنيه انما خمسة جنيه لا؛ هل في خبراء بيحسبوا القيمة الحقيقة الكلام في الدولة دائما اقتصادي أنما المهم عند البشر السوق".
واختتم: "وأرجع أقول المثل؛ سوق التلات في أي محافظة في مصر أي سوق فيه دواجن وبيض وفاكهة وخضار وماشية؛ أنزل السوق كل أسبوع تعرف السعر كام العشر أيام الجاية سيحدث فيها أشياء؛ احنا عايزين الحكومة تاخد في صدرها الصدمات وتقلل التأثير على المواطن غير القادر أو الكادح".
