والدة الطفل "عريس الشرقية" تكشف حقيقة صورة الخطوبة

كشفت والدة الطفل زياد؛ والشهير بعريس الشرقية؛ تفاصيل الواقعة التي أثيرت على مواقع التواصل الاجتماعي موضحة أنه لا يوجد خطوبة كما تردد.

وقالت والدة الطفل في مداخلة هاتفية مع برنامج "صالة التحرير" المذاع على قناة "صدى البلد": "الخطوبة كانت لأختي الصغيرة وكأي فرح عادي ملبسة أبني بدلة وبنت أختي لبست فستان واللي حصل أن الولاد خدوا الدبل من العروسة والعريس أتصوروا بيها".

وأضافت: "بعد عودتنا من الخطوبة جد الولاد قال إن شاء الله تبقى سما لزياد؛ أنا معملتش حاجة اتحاسب عليها دي مجرد صورة أخدتها لابني وبنت خالته دي حاجة مش محرمة أو فيها اجرام وجده قال أتمنى في يوم من الأيام أنه زيادة يبقى لسما؛ ووالدي بيحب الأسرة تبقى مرتبطة ببعض".

وتابعت: "أبني هيروح الجامعة ويشوف ناس تانية ودي حرية اختيار والناس في المجلس القومي للأمومة والطفولة وقالولي تمضى على إقرار أن الجواز دة ميحصلش وأنا أمضى على 100 أقرار وأبني ايه اللي اجوزه وانا لسه بغيرله هدومه".

وأوضحت: "سما خدت الدبلة من خالتها العروسة ومفيش حد قال خطوبة أو كدة ومفيش دبل أساسا والدبلة بتاعة خالتهم العروسة عيال وفرحانين؛ جواز أيه أنا أبني لما يخلص جامعته ويخلص جيشه أحنا ناس على باب الله؛ أحنا أيوة أرياف لكن أحنا مش جهلة".

وأكملت: "والدى قال بالنص أنا نفسي تبقى سما وزياد ولكن نفترض أن زياد شاف واحدة تانية والبنت جالها نصيبها؛ أنا اتخطبت وأنا 18 سنة وأتجوزت وأنا 20 سنة وأنا قلت للامومة والطفولة أمضى على 100 إقرار أنا وأبوه؛ الدبلة مكملتش في أيد البنت 5 دقائق".

وواصلت: "الموضوع طلع تريند عشان أحنا بنحب الهيافة؛ أحنا كشعب هايف؛ صورة زي كدة متتاخدش ويتحط عليها كلام أنا فرحانة بابني ونزلت صورة لابني على الفيسبوك وحطيت عليها قلوب وخلاص أنا ندمانة أن الصورة اتاخدت بمفهوم تاني وأنا بكدب أي حاجة هتطلع على زياد وسما مفيش لا خطوبة ولا جواز".

واختتم: "الاتنين شاطرين في المدرسة واحنا أهم حاجة عندنا تعليم ولادنا وبنجيب ليهم مدرسين؛ أحنا بنعلم ولادنا".