عمرو أديب عن واقعة مستشفى قويسنا: "الاعتداء على الأطقم الطبية سلو بلدنا"

كشف الإعلامي عمرو أديب؛ تفاصيل الاعتداء على طاقم التمريض في مستشفى قويسنا المركزي، مشيرا إلى أن التفاصيل التي سوف يذكرها من واقع التقارير الرسمية للمستشفى.

وقال أديب خلال برنامج "الحكاية" المذاع على قناة "أم بي سي مصر": "الموضوع بتاع مستشفى قويسنا؛ راح وجه وخلينا الأول نحكي الحكاية وبعدين نتكلم في تفاصيل كثيرة؛ أولا ضابط طيار كان واخد مراته في عيادة لطبيبة أمراض النسا واللي بتتابع الحمل؛ الطبيبة اللي هما عندها في العيادة قالتلهم لو سمحتم خلي السيدة الحامل زوجة الضابط الطيار تروح مستشفى".

وأضاف: "اللي هقوله دة من واقع تقرير المستشفى؛ الساعة أربعة وتلت دخل السيدة ومعاها أقاربها وقالوا في حالة صعبة ومحتاجين طبيب وكان في اتنين دكاترة دكتور نبطشي ودكتور أخر".

وتابع: "الاتنين كانوا موجودين في حالات قيصرية وفي هذا الوقت طبقا لتقرير المستشفى طلبوا أن الحالة يتعملها الكشوفات التقليدية وابتدا يتعمل تحاليل وأشعة شوية وجه الطبيب واحد من الاتنين وأظن أسمه الدكتور أبو بكر جه على صوت خناقة بين أقارب السيدة الحامل وأطقم التمريض وطبعا دة موقف طبيعي".

وواصل: "هي رايحة المستشفى في حالة صعبة وابتدا يبقي في خناقة وجوزها وصل ومعاه ناس وابتدا يحصل الاشتباكات المؤسفة اللي رأيناها جميعا وبين قوسين الاعتداء على الأطقم الطبية في مصر سلو بلدنا للأسف".

وأكمل: "دخل حضرة الظابط الطيار وقاموا بالاعتداء على تسع أفراد هو والناس اللي معاه وكان معاه اخته وهي طبيبة كانت في المستشفى وأخدت أجازة؛ أضطر ياخد مراته ويخرج من المستشفى ويذهب إلى مستشفى شبين الكوم التعليمي وطبقا لتقرير المستشفى الظابط اتخانق تاني هناك".

وواصل: "في تسعة راحوا عملوا محضر في قسم الشرطة بأنه قد تم الاعتداء عليهم؛ خلي الحكاية دي على جنب وطبقا للي قالوا أهل الظابط أنه للأسف حصلت حالة اجهاض لزوجته؛ هي راحت المستشفى وهي في حالة صعبة أصلا وكان وراد أن يحدث الأمر".

واختتم: "أهل الظابط بيقولوا إن الست قعدت تنزف 3 ساعات والمستشفى بتقول لا احنا عملنا كل الإجراءات وهما مكانوش صابرين من الأول وإنما أهل الظابط بيقولوا احنا وقفنا 3 ساعات ومحدش جه يلحقنا وعشان كدة رحنا مستشفى أخرى".