إبراهيم عيسى: الحكومة لا يجب أن تتخذ أي قرارات تمس المواطن دون التوافق العام
طالب الإعلامي إبراهيم عيسى الحكومة باتخاذ إجراءات سياسية تلقى القبول، مشيرا إلى أنه يجب توزيع الضغوط الاقتصادية على كل فئات المجتمع.
وقال عيسى خلال برنامج "حديث القاهرة" المذاع على قناة "القاهرة والناس": "الشأن الاقتصادي لمصر لازال حاضرا في الصحافة الأجنبية وتقريبا الموضوع واحد ووجهة نظر واحدة أن الاقتصاد المصري في مأزق البعض بيقول خطير والبعض بيقول حقيقي والبعض بيقول جاد".
وأضاف: "إحنا مش محتاجين نعرف إن عندنا أزمة اقتصادية وأن عندنا عملة مضطربة وأن عندنا بضائع في الموانئ بسبب نقص العملة الصعبة؛ مش محتاجين نعرف أن الأسعار بتاعتنا بتعلى نعرف من الخواجة ليه أي مشوار للسوبر ماركت الموضوع اتفهم واتعرف".
وتابع: "مش محتاجين نفتح التوك شو الساعة تسعة عشان نعرف أن الأسعار زادت؛ المطلوب في ظل هذه الأزمات أن يكون العنوان الأهم هو الشفافية وأن المشاركة في القرار حتمية وضرورية وأن مفيش قرارات تخص فئة من المصريين دون نقاش مع أصحاب الشأن".
وأوضح: "متقدرش تاخد قرار في الرز إلا لما تقعد مع الفلاحين والتجار والمضارب وجمعيات المستهلكين ساعتها تنتج قرار سليم وعامل الحد الأدنى من التوافق والرضا ومينفعش ترفع رسوم حاليا دون التوافق العام ودون المناقشة بين الأطراف".
وواصل: "مينفعش تاخد قرارات توحيد الفايدة لرجال الأعمال بدون ما تقعد معاهم؛ مسألة مفاجأة الناس ومصادمتهم لابد من إعادة النظر فيها؛ الوقت دة وقت مراهم الحريق وترطيب الجروح؛ أرجو من كل مسؤول في مصر أنه يبقى معني بالناس أكتر من أنه معني بكرسيه أو وظيفته".
وذكر: "أرجو أن الناس ووجعها واهتمامها أهم كتير أوي من تستيف الورق والأرقام من أظهار قد أيه أنت موظف مهم عند رئيسك لأن الوظائف بتيجي وتروح صحيح البدلات ممكن تفرق جامد أوي ولكن على مستوى الوزراء ووكلاء الوزارة ربنا ينير بصيرة الجميع".
ولفت: "الاهتمام الحقيقي أنكم لو طول عمركم ناس تنفيذيين وتكنوقراط وملكوش في السياسة؛ يبقي وزير ويقولك أنا مليش في السياسة خالص ياريت على سبيل التغيير يشتغلوا سياسين التلات أشهر دول يفكروا ولو مش عارفين يسألوا ازاي نبقى سياسيين ونطلع قرارات سياسية؛ ازاي نطلع قرارات سياسية اللي فيها قبول ونتناقش مش شطارة هي أننا نطلع قرارات وبعدين نفرضها بالعافية والناس تتعصى عليها".
واختتم: "لما في شركة بتخسر أو بنك بيفلس في حاجة اسمها قسمة الغرماء؛ مصر في أمس الحاجة واحنا بناخد قرارات نتيجة الأزمة قرارات موجعة أو مؤثرة أن نبقى حاطين في زهننا منهج قسمة الغرماء اللي هي لو خسارة تبقى على الكل يعني لو في خسارة تبقى على الكل وكل واحد مننا ليه نصيب من الخسارة انما مش أطراف على حساب أطراف؛ احنا كلنا في مشكلة اقتصادية ومحتاجين نرفع أسعار ماشي بس حضراتكم بقي بقسمة غرماء مش عشان أعدل معدل النمو واظبط الموازنة فأشرب يا شعب قسمة غرماء ويبقي كله خسران".
