عمرو أديب عن تطبيق الفاتورة الإلكترونية: "هو ده وقته.. الناس في أزمة"

طالب الإعلامي عمرو أديب بتأجيل تطبيق الفاتورة الالكترونية ومناقشة الأمر مع النقابات المختلفة، مشيرا إلى أن الظروف الاقتصادية الحالية صعبة.

وقال أديب خلال برنامج "الحكاية" المذاع على قناة "أم بي سي مصر": "ده وقته؟ الناس في أزمة عالمية استنى شوية حاضر؛ أنا فاهم أن المنظومة بتفكر فيها نظريا صح إنما في أعباء سياسية واقتصادية ده وقته؟".

وأضاف: "أنا حاسس أن أنت عايز فلوس وبتحاصرني؛ والفواتير دلوقتي والضرايب في مارس اللي جاي؛ نتكلم ويكون في وفد من النقابات طيب نستني السنة الصعبة تعدي؟ أنا بكلمك على طائفتين في المهن الحرة الأطباء والمحاميين".

وتابع: "هي الناس في مصر عايشة ازاي؟ جزء كبير من الاقتصاد تحت الأرض وناس كتير عايشة برة مظلة الضرائب؛ بندفع كتير قليل صح غلط أنما تحت المظلة في ناس متعرفش الضرايب والضرايب معترفش عنهم حاجة وملهومش حسابات في البنوك".

وواصل: "انت عايز تزود الضريبة على الناس الملتزمة اللي بتدفع أنت بقالك 30 سنة الموضوع دة مش موجود أنت أخر مرة رحت كشفت عند دكتور أدالك فاتورة امتي؟ دخلت للمحامي ورافع قضية قالك الاتعاب كام وسيب برة مبلغ كذا بقالنا سنوات نعيش في العالم اللا مرأي".

وأوضح: "اما تخيرني كمواطن بين أن أخد فاتورة وأني أدفع أكتر هختار ايه؟ الناس بتدور على السعر يا جماعة؛ أنتوا عايزيني أكذب عليكم مش دة اللي بيحصل؟ أنت بتروح تشتري سلعة اللي هي مفروض تاخد فاتورة عشان ضمان يقولك المحل لو باظت أبقى هاتها".

وأكمل: "السنة دي صعبة؛ الحكومة قامت بأشياء عظيمة جدا الفترة اللي فاتت؛ اجلت رفع سعر الكهرباء والوقود؛ لكن الوقت صعب شوية أنا بطلت من وزارة المالية نسألكم التخفيف ونقعد شوية نتكلم نشوف هنعملها ازاي ونقعد مع الناس".

وذكر: "وزير المالية كان يعمل مع الدكتور يوسف بطرس غالي في 2008-2009 كان وقتها مهتم بالفاتورة في المحلات وتذاكر الطائرات والنقل ولكن مكانش بيتكلم عن المهن الحرة".

ولفت: "أنا عارف أن أنتوا بقالكم مدة بتكلموا ولكن المصريين كدة بيشتروا الزبادي ليلة رمضان؛ قعدنا مدة طويلة وقبل 15 يوم من التطبيق بدأت الخناقة دلوقت".

واختتم: "أنا بقول ظبط المنظومة وحاسبني على كل مصاريفي وظبط أنه نقدر نتكلم ونشوف هنقدر نعمل الكلام دة أمتي؛ ظبط كل حاجة وأنا تحت أمرك والمحرج في الموضوع أن لو في فئة من المهن الحرة مدخلوش في الفاتورة كله مش هيدخل يالناس هتدخل كلها يا مش هتدخل خالص".