مصطفى بكري يواجه وزير قطاع الأعمال السابق بالتجاوزات في تطوير الغزل والنسيج
أكد الإعلامي مصطفى بكري؛ أن وزير قطاع الأعمال السابق هشام توفيق قد قام بتخصيص 450 مليون جنيه لمكتب استشاري من أجل تطوير مصانع الغزل والنسيج مشيرا إلى أن المكتب فشل في أداء مهمته.
وقال بكري خلال برنامج "حقائق وأسرار" المذاع على قناة "صدى البلد": "وزير قطاع الأعمال العام السابق قال إن تخصيص 450 مليون جنيه لمكتب استشاري واحد مش ضروري يخض؛ 450 مليون جنيه لمكتب هندسي واحد يخض طبعا ولو حضرتك شايف إن المكتب دة ناجح وكان استشاري محترم للغزل والنسيج في الروبيكي حضرتك بتقول إنه مقدرش يقوم بالمهمة وأنك أضفت ليه 3 مكاتب استشارية وفي الأخر لجأت للهيئة الهندسية لتنفيذ المشروع".
وأضاف: "مين المسؤول عن تخصيص هذا المبلغ الكبير؛ 450 مليون جنيه لمكتب هندسي هو مكتب هويدي لم ينجح في انجاز المهمة الموكلة إليه وأنت تعلم أنه حتى الأن شركة دمياط للغزل والنسيج لم يتم التصميم وشركة حلوان للغزل والنسيج لم يتم التصميم وشركة الوجه القبلي للغزل والنسيج لم يتم التصميم وقيس على ذلك".
وتابع: "هو ليه سنتين يا سيادة الوزير بيعمل ايه والفلوس اللي خدها دي كلها وأنت جبتله ناس تانية ليه إذا كان مش قادر يعمل؛ مشروع التطوير كان مفروض يتسلم أقصى حد في يونيو اللي فات واحنا النهاردة في ديسمبر ولسه لم يسلم".
وواصل: "النقطة التانية سيادتك بتقول إن أنا اتهمتك أنك عينت رئيس شركة مركز القطن المصري وبتقول إن الشركة القابضة هي اللي اختارت وأنا وغيري عارف إن دة صديقك وساكن معاك في القطامية هايتس وراتبه السنوي قد يصل إلى 2 مليون و300 ألف".
وأكمل: "النقطة التالتة حضرتك شككت في صحة اللي أنا قلتله إن نتيجة التباطؤ في المشروع زادت التكلفة من 22 مليار جنيه إلى 30 مليار جنيه وقلت إن سبب الزيادة هو انخفاض قيمة الجنيه ولكن لو تحسبها كويس هتلاقي الزيادة 3.3 مليار جنيه ولو نفذنا من بدري مكناش هنتعرض للزيادة دي".
وأوضح: "كمان أسعار الاسمنت والحديد والعمالة كله زاد بسبب التأخير؛ ومش كدة وبس دانتوا وقفتوا المصانع وقعدتوا العمال في بيوتهم وبتصرفولهم مرتبات شهرية؛ ليه عملنا كدة؟ دا حاصل في مصنع كفر الدوار للغزل بعد ما عملتوه هدمتوه ونقلتوه".
واختتم: "عايز أقولك عن الشركة المعجزة اللي اتعملت عشان تقضى على مصانع الغزل والنسيج؛ وأنا هقولك الكلام اللي قاله الجهاز المركزي للمحاسبات والجهاز أصدر تقرير قال فيه إن الشركة القابضة للغزل والنسيج قامت بابرام تعاقدات عمل لستة خبراء وقال إن الشركة القابضة لم تتبع الطرق المحددة اللي بيجرا على أساسها اختيار مشاريع التطوير".
