إبراهيم عيسى يوجه رسالة إلى وزارة التموين
طالب الإعلامي إبراهيم عيسى؛ وزارة التموين بعدم اتخاذ أي قرارات مؤثرة دول مراجعة أصحاب الشأن والذين تطبق عليهم هذه القرارات.
وقال عيسى خلال برنامج "حديث القاهرة" المذاع على قناة "القاهرة والناس": "في كل الأحوال وبصرف النظر عن قواعد السياسية محتاجين واحنا بنبص لوزارة التموين أن ندرك أكثر من نقطة؛ لا يصح اتخاذ أي قرار يخص التموين بدون مشاركة أصحاب الشأن وأصحاب الاختصاص بمعني أحنا عايزين نعمل تسعير للرز أو السكر أو ضبط لموضوع تمويني ما".
وأضاف: "من المفترض أنه ميطلعش أي قرارات إلا بموافقة أصحاب الشأن؛ بلاش موافقة عشان عزيز على قلبك كمسؤول إن حد يوافق لك؛ مش هنعرف ناخد قرارات نجبرها على الناس إلا لو في حالة قبول على هذه القرارات".
وتابع: "عشان تنفذها وتعمل حالة القبول لابد وأن تشارك أصحاب الشأن؛ الناس اللي عايزة تشتغل بطريقة غير سياسية هي حرة؛ بنجني الشوك بالطرق غير السياسية في اتخاذ القرارات انت محتاج كوزارة تموين أنك متصنعش قراراتك؛ صناعة القرار تشرك فيها كل الأطراف".
وواصل: "هاخد قرار تخص محصول معين يبقي لازم أشرك نقابة الفلاحين معايا؛ والوزارة تقوم بدور الميسر للنقاش ولكن إني أفرض قرار دي مسألة غير سياسية وغير حكيمة والمفروض زي ما بقول كدة واحنا بنتكلم واللي فارض ده العلوم السياسية اللي بتدرس في كليات".
وأكمل: "عشان ناخد قرار يخص الرز لازم يكون في الناس بتوع المضارب وممثلين للفلاحين والتجار والمستهلك ويبقي في خبرا ويقعدوا وتتعرض المعلومات وينتهي الأمر بقرار يصدر بالرضا ده؛ فاكرين عملية الحجر الأسود والكعبة وسيدنا النبي وهو بيضع قطع الحجر السوادء على قميصه وتقول كل قبيلة بمسك طرف من القميص ويتم نقل الحجر الأسود برضا وقبول كل القبائل اللي كانت بتتصارع على شرف نقل الحجر الأسود".
وواصل: "هي دي القصة حط المسؤولية بين الكل والكل يشيل طرف ويعدي بيك أنما أخد قرار مستهدفا هدف ما ضيق في الغالب ليه علاقة بالوزارة أو الحكومة أو رضا الأجهزة؛ ليه علاقة بالمصلحة ومش الصالح وفي فرق كبير جدا ولما أخد القرار ألاقي الفلاحين زعلانين لأن القرار مش دارسينه".
واختتم: "لازم ناخد بالنا من القرار اللي بننزله للناس واما ناخد قرار من وزارة التموين أننا ناخد الرز بسعر معين فالفلاحيين يرفضوا ويحتجوا؛ ضرورة مشاركة كل أصحاب الشأن في اتخاذ أي قرار يصدر من وزارة التموين".
