في رحلات العمرة.. محمد الباز يكشف تفاصيل تهريب آلاف الدولارات خارج مصر

كشف الإعلامي محمد الباز عن قيام إحدى شركات السياحة في مدينة ميت غمر بمحافظة الدقهلية باستغلال المعتمرين الذين يسافرون عن طريقها لأداء العمرة في تهريب النقد الأجنبي.

وقال الباز خلال برنامج "أخر النهار" المذاع على قناة "النهار": "واقعة أعتبرها بمثابة بلاغ للجهات الأمنية والواقعة بالنسبالي خيانة عظمى؛ الأسبوع اللي فات في شركة سياحة في ميت غمر بتطلع رحلات للعمرة والأسبوع اللي فات طلعت فوج فيه 100 معتمر ".

وأضاف: "الناس وهما مسافرين لقوا صاحب شركة السياحة بيدي كل واحد ظرف فيه 3 ألاف دولار؛ والناس استغربت فقالهم كل واحد ياخد الظرف ولما نوصل السعودية هاخد الأظرف منكم؛ 100 شخص في 3 ألاف دولار يساوي 300 ألف دولار".

وتابع: "لو فرضنا أن الشركة بتطلع فوق واحد في الشهر يعني في 300 ألف دولار شهريا بتخرج من مصر وكأننا أمام طريقة تهريب شيطانية؛ ناس طالعين يعملوا عمرة فبتستغلهم شركة السياحة في تهريب العملة الأجنبية أو النقد الأجنبي اللي البلد محتاجاه".

وواصل: "هتقولي أنت عرفت ازاي؛ أنا عرفت من أحد أفراد الفوج والراجل استغرب وهو كلمني من السعودية كمان؛ إذن احنا قدام مافيا ممكن تكون الشركة دي بس اللي بتعمل دة ولكن ايه يعرفنا أن مفيش شركات أخرى بتسلك نفس السلوك وبتعمل نفس المشكلة وتلاقي نفسك قدام 5-6 شركات وكل شهر شركة تطلع المبلغ دة لو بتتكلم عن 10 شركات يدخلوا في 3 مليون دولار كل شهر".

وأكمل: "هي البلد دي بتهون على ولادها كده ازاي؛ ازاي يبقي واصل الاجرام بالناس أنهم يستغلوا شعيرة دينية؛ شركة السياحة اللي بتطلع المعتمرين بتشتغل بيزنس ولكن ازاي هل الناس دي معندهاش ضمير أنها تستغل معتمرين وهما مسافرين يغسلوا ذنوبهم فتركبهم ذنب وفي النهاية هما شركاء في هذه الجريمة

واختتم: "هما شاركوا الراجل بتاع السياحة؛ تقدر تقولي المصريين اشتروا دماغهم؛ أهو اشتروا دماغهم دي بتخسر البلد كتير؛ أنا عندي اسم الشركة وبيانات صاحب الشركة وهذه المعلومات هتكون أمام الجهات الأمنية لأن احنا أمام مشكلة تصل إلى الخيانة العظمي".