إبراهيم عيسى: مصر لم تعرف الغلاء إلا بظهور الحجاب على رؤوس النساء

علق الإعلامي إبراهيم عيسى على ربط بعض الأشخاص على وسائل التواصل الاجتماعي بين تحسن الأحوال الاقتصادية وارتداء النساء للحجاب.

وقال عيسى خلال برنامج "حديث القاهرة" المذاع على قناة "القاهرة والناس": "لسه العقل المصري أسير السلفية وبيروجوا إن اللي بيحصل ده نقمة من ربنا".

وأضاف: "التدين حق لكل فرد إنما أنه يفرض أن الاقتصاد والسياسة والرياضة بتمشي بالتدين، التدين حاجة بينك وبين ربنا، أما معاملاتك مع الناس والقرارات اللي بتتاخد دا يحكمها العقل والمنطق والمصلحة".

وتابع: "لما تشوف النهاردة يقولك الحجاب لرفع الغلاء؟ يا راجل هل ما تقوله جاد؟ لم تعرف مصر الغلاء ألا يوم عرفت الحجاب، الأسعار انفجرت والغلاء زاد على العباد منذ دخل الحجاب مصر مستحدثا في صورة أنه فرض إسلامي مش أنه طقس اجتماعي وطقس قرون وسطي".

وواصل: "مصر لم تعرف الغلاء إلا بظهور الحجاب على رؤوس النساء منذ نهايات السبعينات وحتى الأن، لو انت عايز تربط بين الحجاب والغلاء احترم نفسك لأنه لو ربطت فالربط مش في صالح الحجاب، احنا عايزين ننافق أو نسكت".

وأوضح: "الدعوة والهاشتاجات اللي بتتعمل الحجاب لرفع الغلاء دي ناس مغفلة اللي بتقول الكلام ده"، متابعا: "هل هنا تقدر تتكلم عن التهكم والسخرية من فكرة لجوء مصر لصندوق النقد الدولي، بصرف النظر عن رأيك في الصندوق أو في الحكومة، أنا بس عايز أبص لاستخدام الاخوان لصندوق النقد واتفاق مصر مع صندوق النقد".

وواصل: "الاخوان فجأة بقوا مهتمين بالاقتصاد ومعاناة المواطن المصري وتفسير معاناة المواطن هي تعبير عن فشل الحكومة بينما أيام مرسي افتقاد البنزين والكهرباء دة مش فشل ويبقى الاخوان نفسهم مش هما اللي كانوا بيفجروا أعمدة الكهرباء عشان يخربوا في مصر بعدما أطاح الشعب بمحمد مرسي دلوقت بقى قلبهم على المصريين".

وذكر: "لما نيجي نقارن أو نعرض اختلاف هنا أو هناك يبقى عندنا نوع من التوازن والموضوعية ومع احترامي لكل عواطفك الجياشة لما أقولك إن الغلاء ظهر في مصر مع الحجاب، أنت حولت الحجاب وكأنه ركن من أركان الإسلام رغم أن دا مش رأيي دا رأي أئمة ومفكرين".

واختتم: "لما تستغلني كمجتمع وتقلي إن الستات لما يلبسوا الحجاب ربنا هيرفع عنا الحجاب مضطر أقول لحضرتك ارتفاع الأسعار وارتفاع التضخم ونقعد للحكاوي في السوشيال ميديا أيام ما كان الدولار بـ 65 قرشا".