عمرو أديب يعلق على قذف سائق قطار بالحجارة: "الناس دي محتاجين طبيب نفسي"

علق الإعلامي عمرو أديب؛ على إصابة سائق أحد القطارات بعد إصابته بحجر ألقاه أحد الأشخاص خلال عبور المحطة قرب محطة شربين.

وقال أديب خلال برنامج "الحكاية" المذاع على قناة "أم بي سي مصر": "إيه المتعة في الموضوع ده؟ إيه مشكلة المصريين مع القطارات؟ زمان كنت أفهم أنه اللي بيقطع مثلا الكراسي في القطر مع أنه غلط وغباء لكن ماشي عيال إنما موضوع الطوب ده ليه؟".

وأضاف: "لو تقبض عليهم وأطسوا أحكام محترمة؛ حرام وكتير؛ قولولي تفسير أنا أشياء كتير بعرف تفسيرها لكن إيه عقدة المصريين مع سواق القطر".

وتابع: "الناس اللي بتضرب سواق القطر بتركب القطر؛ محتاجين طبيب نفسي وعالم اجتماع وايه القوة دي التنشين دة والراجل يطلع من اسكندرية لأسوان يفضل حاطط ايده على قلبه أن في كل محطة ينضرب".

وواصل: "طيب الراجل دة لو اغمى عليه والقطر بقي من غير قائد وكان داخل على مزلقان أو محطة وموقفش فيحصل كارثة دا ايه دة؟ قالولنا أن اتقبض على العيال ويكونوا عبرة لمن يعتبر؛ قلوبنا مع سائق القطار وربنا يطلعه بالسلامة".

وأكمل: "والغريب في الأمر أن احنا مش في سويسرا؛ وفي نفس اليوم تحتفل سويسرا بأطول قطار في العالم الدول بتتقدم واحنا بنحط القرش على القرش عشان يبقي عندنا سكة حديد محترمة".

وأوضح: "هي الحكاية دي بتسمعوا عنها بقالكم قد اية؟ أنا بقالي 25 سنة بشوف الحادثة دي وضحايا مختلفين؛ أنا مش قادر أقول كلام لكن دا شروع في قتل دي مش حادثة طارئة".

وذكر: "بيقولولي أعمارهم من 15-18 سنة؛ ايه الفكرة عيال مش متربية طبعا حاجة مؤلمة بجد واحنا في غني عن أننا نعمل كدة والبلد مش ناقصة؛ احنا لازم نبني منهدش".

وكان سائق القطار قد أشار إلى أن اثنين من الأشخاص قد هاجما القطار خلال مروره قبل محطة شربين بـ2 كم موضحا أنه أصيب في عينه ووجه نتيجة الهجوم بالحجارة.

وكشف السائق أنه أصيب بجرح كبير في قرنية العين بالإضافة إلى أصابته بجرح في الوجه بطول 3 سم وأنه تلقى العلاج المناسب.