أول تعليق من عمرو أديب على خسارة الزمالك: "ليلة زرقا على دماغنا كلنا"

علق الإعلامي عمرو أديب؛ على خسارة الزمالك أمام النادي الأهلي بهدفين دون رد في مباراة السوبر المصري والتي أقيمت في دولة الإمارات.

وقال أديب خلال برنامج "الحكاية" المذاع على قناة "أم بي سي مصر": "قدري دايما أن أنا اللي باخد الحاجة في وشي؛ قبل ما أقول أي حاجة يجب أن أتوجه بالتهنئة للنادي الأهلي فريق وجمهور يمكن وقت الماتش كان في حد بيكلمني بيقلي أصل روح النادي الأهلي قلتله لا إحنا معندناش روح".

وأضاف: "الأهلي النهاردة كان في لياقة ونفس وإصرار وانتحارية؛ اللاعيبة بتلعب بشكل انتحاري؛ اللاعيبة في الزمالك نازلة عندها ثقة زيادة والكور بتتنقل وكل الكلام دة ملوش أي لازمة؛ الزمالك نازل واثق زيادة عن اللزوم واضح أن المدرب مأهلهمش".

وتابع: "هما متخيليين أن الفانلة الزرقا دي بتجبلنا البطولات أهي بقت ليلة زرقا وكحلي على دماغنا كلنا؛ النهاردة فيريرا بيلعب بـ8 في الدفاع الأهلي كان بيلعب انتحاري بيدخل على كل كورة وكل لعبة وبيشترك على كل كورة والزمالك كان بيلعب بالكورة والسكينة مفيش الالتحام القوي".

وواصل: "الأهلي لغاية أخر لحظة بيلعب عشرة على عشرة واللاعيبة كلها صح؛ نص الزمالك النهاردة بيلعب في مراكز غلط من أمتي شيكابالا بيلعب شمال وزيزو راس حربة؛ كله النهاردة كان غلط وعنده حالة أنه نازل يجيب الكاس ويرجع بيه على ميت عقبة؛ النهاردة الزمالك خسر بجد".

وأكمل: "الأهلي النهاردة اللي كان نار مش حظه اللي نار وبيلعب لغاية اللحظة الأخيرة؛ أنت اتغلبت حقا وصدقا ولا حكم ولا جمهور ولا أرض ولا حسد ولا أعمال ولا أي حاجة والأهلي كان أحسن ولو الزمالك هيفضل مكمل كدة أعمل حسابك مفيش زمالك السنادي".

وأوضح: "الأهلي كسر نحسه النهاردة واعرف بقي لما الأهلي بيكسر نحسه بيحصل ايه؛ لو الزمالك عايز يبقى منافس حقيقي لازم يعيد النظر في اللاعيبة الجديدة اللي جات وفي سلوكيات اللاعيبة ماتش وعدى وانما لو هتكمل كدة مش هينفع".

ولفت: "حاجة مهم أقولها يا أخي أنا بعشق الإمارات؛ دي بلد جدعة ومنظمة عملولنا احتفال من ألف ليلة وليلة؛ أستاد هزاع بن زايد دة محصلش؛ أسهل حاجة أن الناس تطلع منظمة على المنصة".

واختتم: "لا يسعني غير أن أنا أدين شيكابالا مينفعش وقت تسليم الجوايز متطلعش تاخد الجايزة بتاعتك ليه احنا هزيمتنا وحشة؟ ليه مبنعرفش نتهزم بكرامة؟ شيكا كدة غلط مينفعش تنهي حياتك بالشكل دة".