عمرو أديب ينتقد البيروقراطية الحكومية: «في موظف موقف البلد»
أكد الإعلامي عمرو أديب؛ أن البيروقراطية الحكومية تتسبب في مشكلات كثيرة في الاقتصاد المصري لافتا أن الدولة يجب أن تتخلص من هذه المنظومة.
وقال أديب خلال برنامج "الحكاية" المذاع على قناة "أم بي سي مصر": "أنت مش هتجيب مستثمر من برة والمستثمر اللي جوة مشاكله لسة مستمرة؛ يا جماعة البلد دي أفاتها البيروقراطية والموظف القديم؛ البلد دي كانت ممكن تبقي سنغافورة".
وأضاف: "في موظف موقف البلد؛ مبهدل البلد؛ طرق وعملت غاز ووفرت طاقة وجبت استقرار وعملت؛ تروح الورقة عند الراجل متعديش؛ النهاردة رئيس الجمهورية بيقول أنا عملت الموضوع بنفسي أنا حطيت مع فريق عمل 25 ألف ساعة عشان نخلص الحاجة في سنتين بدل أربعة".
وتابع: "هو رئيس الجمهورية هينفع يكمل كل مشاكل المصانع؛ الراجل اللي عايز يزود دور في مصنع لازم يكلم عبد الفتاح السيسي؛ واللي عايز الأمن الصناعي يحل عنه ومش لازم يبقي فيه شاي بالياسمين يكلم عبد الفتاح السيسي؛ لا مفيش دولة بتمشي كدة".
وواصل: "البلد دي حلت كل حاجة؛ كهرباء واتحلت وأنا كنت موجود لما الحجر وقع على الناس في الدويقة ويوميها رجعت قلتلهم البلد دي مفيش فيها فايدة واتحلت؛ طيب أنت بتحل كل حاجة اشمعني دي واقفه؟ في عندك قانون تصالح مش عارف تكمله والناس مش عارفة تاخد استمارة عشرة".
وأكمل: "في حد قاعد حجر عثرة؛ آن الآوان ودي فرصة أن هذا الأمر ينسف تماما؛ البلد دي فيها مشاريع لما بيحبوا يمشوها بتمشي والدولة في بعض الأحيان تخطت النظام البيروقراطي لأن الحاجة دي مش بتخلص؛ عملوا ايه في المحور؛ مساء الخير العمارة دي لازم تتشال؛ تعويضك كام؟ الشيك أهو هد العمارة وكمل المحور؛ أنا قعدت شفت المحور دة وكل وزير يجي يقولك أصل دة ركامي منقدرش نقربله".
واختتم: "دا ميجبش استثمار وميجبش نهضة سريعة دا يقدر يمشي في حاجات معينة ولكن تشغيل لا أنا خوفي أن الأزمة تبتدي تعملك بطالة وبعض الناس تقولك معلش بقي نمشي 20 عامل من هنا والا من هنا؛ وفعلا بدأنا نسمع أخبار زي كدة".
