وزير التعليم: الدخل اليومي لمراكز الدروس الخصوصية يصل إلى 60 ألف جنيه

كشف الإعلامي أحمد موسى، عن تلقيه اتصالا هاتفيا من الدكتور رضا حجازي، وزير التربية والتعليم أوضح خلاله رؤيته حول اقتراحه بتقنين الدروس الخصوصية.

وقال موسى خلال برنامج "على مسؤوليتي" المذاع على قناة "صدى البلد": "قبل الهواء مباشرة كلمني الدكتور رضا حجازي وكان بيعقب على حلقة الأربعاء الماضي واللي اتكلمنا فيها عن الدروس وتقنين الدروس الخصوصية".

وأضاف: "الدكتور رضا حجازي قال موضوع منظومة التعليم هدفها الصالح العام وجودة التعليم وسيدعو إلى حوار مجتمعي يضم الأسر وأولياء الأمور والمعلمين وأصحاب مراكز الدروس الخصوصية".

وتابع: "قال إن الهدف تحقيق مصلحة للجميع وقال طبعا أنا شفت وكان في نوع من العتب وقال بوضحلك عشان تبقى عارف هدفي ايه، بنتكلم عن حوار مجتمعي حول منح تراخيص مراكز الدروس الخصوصية ومش هيعمل قرار قبل المنظومة ما تقعد واللي هنخرج بيه هو اللي هيتم تطبيقه".

وأوضح: "كل الناس تقعد واللي هنخرج بيه هو اللي هيتم تطبيقه، أصحاب مراكز الدروس لهم مصلحة وأولياء الأمور لهم مصلحة والوزارة لها مصلحة وما سيخرج سيكون القرار، قالي أنا مش هاخد قرار منفرد وأنا مع الجميع".

وأكمل: "قال هنعمل حوكمة للسناتر وهيبقي في متابعة لهذا الأمر وعايز أعرف مين بيدي الدروس وهل هو كفء ولا مش كفء والسناتر مش هتلغي المدرسة، المدرسة موجودة وبنحافظ عليها وقال إنه مع كل الأطراف ومش هيظلم حد والأولوية بالنسبة للوزير الأسرة المصرية وأولياء الأمور والتلاميذ والمعلمين وقال أنا عايز الجميع يستفيد".

وواصل: "أي عائد هيدخل الوزارة هيتم إنفاقه على المدارس الفقيرة وفي أرقام اتقالت حوالين انفاق الأسر على الدروس وقال 47 مليار جنيه وهذا رقم هائل في بلد تعاني، بنتكلم عن مليارات وبعض مراكز الدروس الخصوصية حسب معلوماتي الخاصة دخلها اليومي بس 60 ألف جنيه".

وذكر: "بنتكلم على اقبال طلبه وانفاق، وهنا أقول للاسر لو انت النهاردة الابن اللي بياخد حصة في سنتر فيه 100 هل اللي فيه 100 زي اللي فيه 40؟ الهدف أن حوار مجتمعي والجميع يستفيد وحوكمة الامر والوصول للصالح العام وجودة نظام التعليم".

واختتم: "الوزير مخدش قرار ومش هاخد القرار إلا بعد الحوار المجتمعي، هسمع للناس وبعدين أخد القرار وبشكر الوزير رضا حجازي لأنه كان حريص على الاتصال بنا وتوضيح الأمور".