حسام حبيب: "شيرين اتضربت وخدوها المستشفى حافية تحت تهديد السلاح"
كشف المطرب حسام حبيب؛ تفاصيل نقل الفنانة شيرين قسرا إلى أحد المستشفيات، مشيرا إلى أنها نقلت تحت تهديد السلاح الأبيض إلى المستشفى بواسطة شقيقها.
وقال حبيب في مداخلة هاتفية مع برنامج "الحكاية" المذاع على قناة "أم بي سي مصر": "كنت قاعد مع شيرين وحد داخل عليها البيت وفاتح مطواة؛ أقسم بجلال الله وشيرين موجودة تسأل في الكلام ده شفتها بتتسحل من شعرها ونازلة حافية ببجامة ومرمية في عربية بتجري بيها؛ ضرب وسحل ومطواة مفتوحة عليها وأقذر الشتايم وقعدت تصرخ وتعيط وحاولت أفهمهم ننزل بالراحة ولكن مفيش فايدة".
وأضاف: "حاولت أقلهم بالعقل والهدوء كان الكلام الموجه ليها شتايم وتهديد وقلتله ياسيدي احنا مش هنرجع لبعض وهي كانت بتقوله أنا يتعمل فيا كدة أنا اختك الكبيرة اللي عالجتك وأنا أضربت على دماغي ووقعت على الأرض وضلوعي مشروخة".
وتابع: "أخوها طلع مع أصحابه وضربوني ونص ساعة في الموضوع دة وبتوع المستشفى يكتفوني وخدوا تليفوناتنا؛ أنا وهي والبنت اللي بتشتغل معاها؛ ونبيل إدوارد المنتج الفني والشاعر محمد سرحان جم لقوني في الشارع واقف بعيط".
وأوضح: "أنا بقي عندي عقده من المنظر وبقيت قاعد في بيتي خايف وأنا مش مصدق أن شيرين يتعمل فيها كدة وهي خدت شقة في التجمع عشان تبقي قريبة من شقة بتوضبها وقالتلي أقسم بالله هردلك اعتبارك وأقف في ضهرك وأنا قلتلها أنا مش عايز حاجة غير أنك ترجعي شيرين".
وواصل: "هو كان عارف مكانها ودخل بمفتاح كانت شيرين ادته لواحدة وثقت فيها وهي اللي عارفة أني كنت مع شيرين في الوقت دة والموضوع كان مرتب لأكبر من كدة وبيقولوا حسام عنده وسايط هو أنا كان حصل معايا كدة".
وأكمل: "رمالي التليفون وهو ماشي وسألت الناس اللي معايا أبلغ البوليس قالولي كدة هتعمل شوشرة رحت لابن خالتي وغيرت هدومي عشان مرجعش لأمي بالشكل دة؛ سارة الطباخ بعتتلي رسالة قالتلي شيرين كويسة قلتلها لا وقالتلي لازم نكلم المحامي بتاعها".
واختتم: "انا مكانش ينفع أكلم المحامي بتاعها لأنه خصمي والراجل قالي تشهد معايا قلتله أيوة ولكن مرحتش المستشفى ولا وقفت ولا ناديت عليها".
