مصطفى بكري للحكومة: "راجعوا نفسكم الناس مش مستحملة"
طالب الإعلامي مصطفى بكري؛ الجهاز الإداري للدولة بالتوقف عن تعقيد الأمور أمام المواطنين وتنفيذ القرارات الحكومية دون النظر للأبعاد الاجتماعية.
وقال بكري في مداخلة هاتفية مع برنامج "حقائق وأسرار" المذاع على قناة "صدى البلد": "لما لشوف الحملات اللي بتستهدف البلد دلوقت وبشوف الرئيس السيسي وهو بيطعن من هنا ومن هناك وهو متحمل لأنه عارف في هدف بيحققه وفي قضية قدامه".
وأضاف: "ياسيادة الرئيس الناس دي لازم تشتغل معاك؛ كتير من موظفي الأجهزة الحكومية سبب اللي احنا فيه وسبب حالة الاحتقان الموجودة؛ النهاردة لما أشوف قرارات تطلع بتقفيل كل المحلات الموجودة في أكتوبر والعبور؛ لا أنت مخالف والنبي دلوقت افتكرت أن دة مخالف؟ وفي الظرف دة؟ ياعم دا الناس مخنوقة ما تلموا نفسكوا شوية وأعرفوا أن البلد دي متحملة الكثير من أجل المستقبل".
وتابع: "لازم أي قرار يتراجع من رئيس الحكومة لأقل موظف؛ يارئيس الحكومة حسك الاجتماعي لازم يكون عالي البعض الاجتماعي لازم يتم مرعاته مش عندك قرار نفذ يا جدع ومنكررش مأساة تعطيل البلد أربع سنن في قانون البناء والتصالح".
وأوضح: "لازم ترجعوا نفسكم كويس أوي لأن الناس مش مستحملة؛ أنا عايز أقولك حاجة يا حكومة ويا موظفي الجهاز الإداري؛ رحمة بالشعب المصري اسمعوا كلام الرئيس وتوجيهاته وحرصه مبيقولكش نفذ وانسى البعد الاجتماعي مانت النهاردة بتيجي تقولي قفل المحل دة طيب هاكل منين؟ هسرق؟ كدة مينفعش لما أروح مشكلة أتعقد فيها الفساد الموجود لازم ينتهي".
وأكمل: "النهاردة بقي في فجر في الفساد وكل واحد مش عاجبه؛ يلا ياعم أعمل اللي أنت عايز تعمله؛ الشعب المصري مش هين الشعب المصري واعي وأسقط أنظمة وقادر أنه يحجمك أنت وهو؛ احنا عندنا ثقة في بلدنا والرئيس السيسي مجاش فرض نفسه علينا احنا اللي جبناه؛ يارئيس أنت بتعمل كدة وغيرك بيفسد من تحت".
وواصل: "النهاردة لما أجي أعمل أي قانون لازم أعمل لجان استماع الأول؛ أسمع أصوات الناس وأشوف مشاكل الزراعة والبناء والمصالحات وأشوف الشباب العاطل دة أتعامل معاه ازاي؛ كويس أن احنا عندنا 5 مليون فرصة عمل وشغالين وكويس أوي المشروعات القومية الكبرى اللي مصدر أبهار للي برة واللي جوة".
واختتم: "النهاردة اللي بيحصل في المحافظات والمناطق الأخرى شيء نفخر بيه كمصريين ولكن في مشاكل تحتية لازم نبص لها؛ في مشاكل في الصناعة وعند الفلاحين؛ النهاردة من حقي كمواطن أه الأرض الزراعية محدش يقرب منها ولكن عايز أبني بيت لابني أروح فين".
