عمرو أديب عن القصف الروسي لأوكرانيا: "محدش يهزر مع بوتين عشان دمه تقيل"
علق الإعلامي عمرو أديب؛ على القصف الروسي لعدد من المناطق الأوكرانية صباح الاثنين ردا على عملية تفجير جسر كيرتش الواصل بين الأراضي الروسية وشبه جزيرة القرم.
وقال أديب خلال برنامج "الحكاية" المذاع على قناة "أم بي سي مصر": "النهاردة الصبح بوتين انتقم؛ خلاص الراجل قالك أنتوا بتضربولي كوبري؟ عد بقي ويبدو أن بوتين قد قرر أن أوكرانيا دي تعود للأزمنة الأولى في التاريخ هو ببساطة بيضرب محطات الكهرباء والماية وعلى فكرة العاصمة الأوكرانية لم تضرب من أربع شهور".
وأضاف: "هو قالهم كدة؟ دا الجسر اللي بيربط القرم بالأراضي الروسية؛ تضربوهولي؟ والنهاردة في اخبار جديدة أن أحتمال يكون الجسر انضرب بمسيرات؛ هو قالك إن ليه متخيلين أنه انضرب من تحت مش من فوق؟ بيقولك الكباري مصممة أنها تحتمل تأثيرات واحتمالات من فوق وواضح كدة أنه انفجار من تحت".
وتابع: "الرواية الروسية أن السيارة جاءت من الجانب الروسي؛ والكوبري أهميته أنه بتاع الأمدادات وأمبارح قعدوا يتريقوا عليه وكان تم 70 سنة وحطولوا الانفجار وحطولة اغنية مارلين منرو وهي بتغني لكيندي كل سنة وأنت طيب يا حبيبي وابتدوا يهزروا معاه وانت المفروض تعرف أن محدش يهزر مع بوتين لأن دمه تقيل".
وواصل: "بوتين مبيحبش الدعابة والنهاردة أربع خمس مناطق في أوكرانيا الناس رجعت تشوف الحرب تاني؛ هذا الأمر بيعلي الموضوع جدا الصواريخ الروسية النهاردة مبيضربش أي حاجة عسكرية كله مدني هو بيضرب كل الأهداف المدنية ويبقفل كل مصادر الحياة وقالهم لو حصلت تاني هتشوفوا أسوأ من كدة بكتير".
وأكمل: "هو بقولك أنا منضربش ولو أتضربت أنا لحمي مر ميتهضمش؛ أحنا في مرحلة صعبة جدا الأمر الذي يجعلك في مصر تفكر مرة أخرى؛ هو الجنون ده مكمل لغاية أمتي".
واختتم: "بوتين الأسبوع اللي فات عين واحد يمسك العمليات مش عايز أقول بيقولوا عليه أيه؛ لا يرحم جايب واحد في سوريا عمل حاجات لا يرحم وأرجع تاني وأقولك والله ما يهمني أنا بقول لحضرتك أنت بتدفع تمن دة من ميزانيتك واستقرارك بشكل كبير وفي ناس بتتريق بتقولك هو احنا اللي بنحارب؟ طيب أرد أقول أيه؟ أنت شايف ايه؟ شايف الحكاية عاملة ازاي؟".
