أحمد موسى يهاجم BBC على خلفية ترويجها لانهيار الجنيه المصري
هاجم الإعلامي أحمد موسى؛ هيئة الإذاعة البريطانية بي بي سي؛ على خلفية طرحها اعلان ممول يروج لما أسمته الشبكة البريطانية بانهيار الجنيه المصري.
وقال موسى خلال برنامج "على مسؤوليتي" المذاع على قناة "صدى البلد": "يوم الحد اللي فات البي بي سي؛ الجنيه الإسترليني انخفض أمام الدولار؛ حوالي 22% احنا انخفضنا حوالي 19-20 أنت عارف البي بي سي عاملين اعلان ممول؛ خبر كدة من الأكاذيب بتاعتهم عشان يروح لأكبر عدد من الناس".
وأضاف: "سايب الإسترليني بتاعه وبيتكلم عن الجنيه بتاعي؛ دا في إطار ايه؟ أنه بيدعمك وأنه عايزك تبقي كويس وفرحان وسعيد والا بيقولك ايه؟ هل كلمك على الأضرابات والمظاهرات عنده؛ أعلان ممول ودافعين فلوس عشان الإعلان دة ناس كتير تشوفه".
وتابع: "بيتكلم عن انهيار الجنيه المصري؛ اعلان مدفوع الأجر؛ هو دي صحافة هي دي مهنية؟ دي مهنة دا حياد والا دة تدمير لاقتصاد؟ تخويف للمواطن ما أهو حد يطلع في البي بي سي يكتب انهيار الجنيه الإسترليني أمام الدولار لم يحدث ولن يحدث عشان عايز يعمل الحالة؛ هو قنوات الاخوان فين النهاردة والخونة دول قاعدين فين؟ ماهو في بريطانيا".
وواصل: "دا مش اعلام دول موجهين دي كيانات إعلامية موجهة ضدك دول بيشتغلوا لحساب أجهزة الاستخبارات ومحدش فيهم بيشتغل من دماغة؛ خطابي لم يتغير من 2013 بفضل أقولهولك وأقولهولك تاني وعاشر؛ اشمعني اختار الجنيه المصري؟ اليورو والين والاسترليني حصل فيهم انهيار؛ الإسترليني انخفض لأدنى مستوى عملوا عليه اعلان ممول؟".
وأوضح: "مفيش عملة من العملات الرئيسية محصلهاش انخفاض؛ اتكلمت عنه البي بي سي؟ لا لأن عنده هدف ورسالة عايز يوصلهالك ويبقي حضراتكم شايفين اللي بيتم ضد بلدنا؛ هذا وطنا جميعا؛ دا النهاردة استثمارات سندات اتسحبت من إنجلترا اقتربت من 3 مليار دولار".
وأكمل: "دا نتيجة أن الوضع الاقتصادي لديهم كويس يعني؟ عشان الاقتصاد بتاعهم قوي الناس بتنسحب والا الوضع بعافية شوية اتنين تلاته أربعة؟ وكالة فيتش واحدة من أهم المؤسسات الاقتصادية تخفض توقعات ديون بريطانيا من مستقرة إلى سلبية".
واختتم: "سايب أوضاعه الداخلية وجاي يتكلم على مصر؛ بيهيج وبيمول ويدفع فلوس عشان حاجة يتم تداولها وهو الوضع عنده سيء".
