تامر أمين يدعو أولياء الأمور إلى التمرد على "السبلايز": "مش هنصرف على المدارس"
دعا الإعلامي تامر أمين؛ أولياء الأمور؛ إلى التمرد على الاحتياجات التي تفرضها المدارس الخاصة على الطلاب قبل بداية العام الدراسي.
وقال أمين خلال برنامج "أخر النهار" المذاع على قناة "النهار": "بمناسبة المعلم والمدارس مقدرش متكلمش عن الاحتياجات أو السبلايز والطلبات التي تطلبها المدارس الخاصة من أولياء الأمور فوق المصاريف واللزوميات الموجودة على الطالب".
وأضاف: "لازم الولاء وأولياء الأمور يجبوها وألا الولاد مش هيدخلوا المدراس ومش محتاج أقولهالكم تاني لأن فيها من الكوارث مالا يمكن تكراره؛ شمع وسمغ وغيارات وكحول إيثلي وصابونة مش عارف ايه؛ المدرس عايزة تتجهز كلام لا يليق ولا يصح".
وتابع: "بطالب وزارة التربية والتعليم أن تكون في منتهى الشدة في إذعانها لأولياء الأمور لتحمل مالا طاقة لهم به هتقولي ايه اللي يجبر أولاء الأمور أنهم يزعنوا لطلبات المدارس هقولك مسكاهم من الأيد اللي بتوجعها".
وواصل: "توصلنا بس استغاثة أو شكوى أن المدرسة غلست على الواد عشان مجابش الاحتياجات دي واحنا هنجيب لكم حقكم؛ شغلانتنا إعلام ونكون لسان الناس ومحامي الناس؛ ولما تواصلنا مع وزارة التربية والتعليم قالولنا احنا مش هنتهاون مع أي ظلم أو أي ضرايب باهظة تفرضها المدارس".
وأوضح: "مش كفاية المصروفات المبالغ فيها اللي احنا موافقين عليها أنا أدعو الناس إلى التمرد على السبلايز؛ المدرسة عايزة تجيب صابون تجيبه على نفقتها؛ عايزة تجيب كحول تجيبه على نفقتها دي مدرسة خاصة كل الأصول والاستخدامات العامة للمدرسة أولياء الأمور مش ملزمين بيها".
وأكمل: "حيطة عايزة تندهن في المدرسة أنا مالي؟ يقولك عشان ابنك يقعد في فصل كويس مانا لازم أبني يقعد في فصل كويس؛ وجي مسؤولية حضرتك كصاحب مدرسة أمال أنت مدرسة خاصة ليه وبتاخد مصاريف غالية ليه؟ مقابل تربية وتعليم ونظام ومبني تعليمي مجهز؛ سمعتوا كلمة مجهز؟ يعني حضرتك اللي تجهزه كصاحب مدرسة".
واختتم: "شوية شوية هتقولي هات التختة معاك وأنت جاي في مدارس بتخلي الولاد يجيبوا الطباشير ليه احنا هنصرف على المدارس بأمارة ايه؟ هو أنا أغنى من صاحب المدرسة؟ أنا اللي أزين الفصل؟ أنا اللي أجيب الصابون بتاع الحمام أنا اللي أجيب الباسكت؟ أرجوكم اللي ميقدرش على السبلايز دي وشايف أنها أكتر من احتياجات ابنك لازم تشتكي".
