عمرو أديب يعلق على التوقعات باقتراب الحرب النووية
علق الإعلامي عمرو أديب على التكهنات حول مدى إمكانية استخدام روسيا السلاح النووي في الحرب الأوكرانية مشيرا إلى أن هناك بعض المؤشرات التي يعتقد البعض أنها تشيرا إلى ذلك.
وقال أديب خلال برنامج "الحكاية" المذاع على قناة "أم بي سي مصر": "كان أخونا بوتين هدد كدة من بعيد بالخيار النووي وجه راجل صديقة كدة قال إن روسيا لازم تستخدم سلاح نووي خفيف؛ حصل حاجات في الكام يوم اللي فاتوا وبدأوا يسموها كلها بالقيامة".
وأضاف: "قالك في تلات اختيارات قدام روسيا الأول القنبلة النووية الكهرومغناطيسية تعطل كل الاتصالات في أوكرانيا؛ والاختيار التالي القنبلة النووية التكتيكية اللي هتموت شوية كدة بس في أوكرانيا بس والخيار التالت النووي على أبوه".
وتابع: "عندهم قطار القيامة وقالك القطار اتحرك وقالك لما بيكون في مناورات نووية القطر دة بيتحرك عشان بيكون فيه تجهيزات نووية وهما قالوا مش عارفين اتحرك ليه دلوقت؛ عندهم غواصة نووية بيسموها غواصة يوم القيامة وبيقولك ان الخبراء عندهم شك أنها السبب في الانفجار في خط نورد ستريم اما كانت بتتحرك ومحدش كان شايفها".
وواصل: "الغواصة فيها توربييدات نووية تضرب على مسافة 1000 كم يعني لو موجودة في أسوان تضرب الإسكندرية؛ ودلوقتي أجهزة المخابرات مش لاقيينها؛ الغواصة فيها ست توربيدات والتوربيد الواحد قادر على عمل تسونامي إشعاعي ولو ضرب أي مدينة يخلصها تماما وتخلص على سواحل كاملة ولو من الست توربيدات ضروبولنا تلاتة هتبقي يا حلاوة الدنيا يا حلاوة".
وأوضح: "العالم يتحدث الأن في هذه الموضوعات هل هي قابلة التحقيق لا؛ هل دي من الاحتمالات الموجودة لا؛ لكن هو السؤال حد كان عارف أن الأمريكان هيضربوا هيروشيما ونجازاكي؟ هل حد كان عارف أن بوتين هيكمل في الحرب 230 يوم؛ هما بيسالوا إلى أي مدى الغرب جاهز للضربة التانية؟ في الحالة دي هل الأخ بايدن هيدوس على الزرار والا هيدين والا هيتريث؟".
واختتم: "لو بوتين وصل لمرحلة أنه يائس؛ الغواصة بيقولوا موجودة في القطب الشمالي من هناك تضرب وانتهى الأمر وفي الحالة دي مش عايز حد يكلمني تاني عن الأسعار والمستقبل؛ العالم دي برة حياتها بتكون كويسة عشان يفكروا؛ بيقولك الغواصة دي تقدر تفضل تحت الماية 120 يوم".
