عمرو أديب يعلق على ارتفاع أسعار الخبز السياحي
أكد الإعلامي عمرو أديب؛ أن هناك أزمة في سعر الخبز السياحي مشيرا إلى أن ارتفاع السعر جاء نتيجة ارتفاع أسعار الدقيق المستخدم في انتاجه.
وقال أديب خلال برنامج "الحكاية" المذاع على قناة "أم بي سي مصر": "أزمة أيوة بنشوف مشاكل أيوة وأنا بصراحة مقدرش أقولك بدل الولد ما بياكل سندوتشين اديله واحد ومقدرش كمان أقول للراجل بتاع المخبز أخسر؛ دقيق سعره بيغلي ومخابز؛ الرغيف الصغير دة قطمتين عند العيل ودا هتحطله فيه اية؟".
وأضاف: "احنا دلوقت فعلا بتبان عندنا أثار الأزمة العالمية الاقتصادية أنت بتجيب قمح سعره غالي وبيتاع من الدولتين اللي فيهم حرف؛ أنا مقدرش أناشد ضمير أبلة حكمت؛ في ناس شغالين على الوطنية وأنا مبفهمش دا خالص؛ السوق بيقول النهاردة لا في ناس ابتدت تعمل الكلام دة".
وتابع: "الناس في المخابز الراجل مش قادر يجي على كاره؛ الدقيق زاد على الراجل وكله على الزبون في النهاية وهنا الدولة تعمل ايه دا دور السيد وزير التموين أو السيد رئيس الوزراء".
وواصل: "نستحمل لأنه زي مانا شايفها كدة مفيهاش حل مثالي أو في النهاية الاهتمام بالرغيف التاني البلدي ويكون هو البديل الموجود للناس اللي شايفة أن الرغيف دة لا يسمن ولا يغني من جوع وبصراحة الرغيف مبيقعدش لما تحطة في التلاجة وتيجي تستخدمة تاني بيبقي هدر".
وأكمل: "دة اللي بلالي فيه بقالي شهور الحاجات السنة اللي فاتت حاجة والسنادي حاجة تانية؛ أحنا بنحاول نشوف الناس نقدر نعملها ايه وأكيد السيد وزير التموين يقدر يعمل حاجة أنما الوضع زي مانا شايفه انعكاس للأزمة العالمية".
وأوضح: "في النهاية الرغيف موجودة والناس عملت سندوتشات والدولة عاملة حاجات اللي هي الوجبة المدرسية يمكن دا يساعد شوية".
ومن جهته علق عطية حماد؛ رئيس شعبة المخابز بالغرف التجارية على أزمة ارتفاع سعر رغيف الخبز مشيرا إلى أن هناك لغط بشأن حجم رغيف الخبز السياحي، مشيرا إلى أن الحجم لم ينخفض وأنه كان يحث زملائه على الوقوف مع البلد في ظل الظروف الصعبة.
وقال حماد في تصريحات تلفزيونية: "أعرف أن هناك ضغوط عالية علينا وسعر الدقيق يتغير ويرتفع ولكننا يجب أن نتعاون لمساندة البلد في ظل هذا التوقيت".
وأضاف: "حجم ووزن الرغيف يعود إلى المخابز ولا يوجد موازين في الوقت الحالي ومعدل الوزن يختلف طبقا لسعر الدقيق حسب نوع القمح".
واختتم: "أناشد أصحاب المخابز بالتحلي بالوطنية وأنه يجب أن يقف الجميع مع الدولة في ظل الظروف الحالية؛ لقد حققنا مكاسب كثيرة في فترات سابقة ويجب أن نساند بلدنا في الوقت الحالي ".
