عمرو أديب: "التجار بيتعاملوا مع بعض على سعر دولار غير بتاع البنك"

أكد الإعلامي عمرو أديب؛ أن هناك اختلاف بين سعر الدولار في البنوك والسعر الذي يتعامل به التجار مع بعضهم البعض في السوق.

وقال أديب خلال برنامج "الحكاية" المذاع على قناة "أم بي سي مصر": "همسة في أذن البنك المركزي؛ السعر بتاع الدولار اللي البنك المركزي بيتعامل بيه كل يوم اللي هو بيزيد كل يوم أغلب الناس اللي بتاجر مش ملتزمة بيه".

وأضاف: "سعر الدولار في السوق بين الناس رقم تاني؛ أما يبتدي في سعرين هيكون عليك ضغط في ناس كتير بتسأل ليه في حاجات أغلى من تمنها؟ حقيقة الأمر أن التجار بيتعاملوا مع بعض على سعر دولار غير بتاع البنك المركزي".

وتابع: "بقولكم ملاحظة ناس كتير مش واخدة بالها منها لكن موجودة السعر في البنك 19.56 والتجار بينهم وبين بعض بيتعاملوا بـ23 جنيه فرق الـ3 جنيه دول فين؟".

وواصل: "عشان نبقى فاهمين غير سعر الدولار اللي بيزيد جوة البنك هناك سعر أخر للدولار بقي في السوق وناس كتير بيتعاملوا معاه بأريحية والدولة حتى الأن شايلة فرق الدولار على دماغها وفرق زيادات الأسعار للسلع برة".

عمرو أديب يوجه رسالة إلى البنك المركزي بشأن سعر الدولار

وأكمل: "الناس بتقول الدهب برة بينزل ليه عندنا بيزيد؟ وبالمناسبة ممكن تطبق ده على البنزين؛ البترول سعره نزل برة لكن الدولار بيزيد والدولار بياكل فرق السعر اللي نزل برة؛ برة أه سلع أساسية ممكن تقل ولكن الزيادة بتاعة الدولار بتعمل مشكلة ولازم كلنا نفهم أن الدولة دي بتواجه واحدة من أصعب أزماتها أحنا في الفلوس مفيش أنشا ومفيش كلام شعبوي في كلام اقتصادي".

وأكمل: "الناس شايفة؛ الناس اللي هتروح بكرة التموين وتلاقي أزازة الزيت زاد من 23-25 زاد ليه؟ عشان أنت بتستورد حاجتك؛ الناس اللي بتكلم عن الاكتفاء الذاتي أنا معاك لكن هل هيحصل بكرة؟ دانت لو زرعت مصر كلها قمح مش هيطلع بكرة".

ولفت: "عايزين نكلم الناس لأن الناس في مصر شيفاه وعارفة أنت عامل أيه وشايفة الزيادات في المعاشات ومش عايزين نقول للناس حاجة مش هتحصل دلوقت؛ الست ليز تراس وصلت الحكم في بريطانيا من 3 أسابيع النهاردة معمول استفتاء أنها لازم تمشي".

وذكر: "بريطانيا أقوى مننا وخايفين من مستوى الديون إذا كانت الدول دي كذلك أمال احنا نعمل ايه؟ أنا عندي قناعة أننا هنمر منها؛ بتجنن لما أبص في الموبايل وألاقي اللي بيقول هو عمرو أديب بيمهد لايه هو أنا لسة همهد أنا بنقلك أنا دوري أنقلك".

واختتم: "الإنجليز عندهم مشكلة أن فوائد الرهن العقاري بقت ستة في المية؛ أنت هنا عندك مسؤولية اجتماعية ومن يومين أنت قربت على المليون شقة".