تامر أمين يهاجم اتحاد الكرة بسبب مباراتي ليبيريا والنيجر
علق الإعلامي تامر أمين؛ على أداء المنتخب الوطني لكرة القدم خلال المباريات الودية التي خاضها تحت قيادة مدربه الجديد البرتغالي روي فيتوريا.
وقال أمين خلال برنامج "أخر النهار" المذاع على قناة "النهار": "امبارح كانت المباراة التانية لمنتخب مصر تحت قيادة مدربه البرتغالي روي فيتوريا والحقيقة أننا كسبنا ليبيريا 3 صفر وقبلها كسبنا النيجر 3 صفر؛ وروي فيتوريا سافر البرتغال في أجازة".
وأضاف: "أنا عندي رسالة لاتحاد كرة القدم المصري؛ أدينا لعبنا مع الفرق أهو وكسبنا تلاته صفر في تلاتة صفر؛ وأبداع وأهداف وعرض حاجة محصلتش يعني؛ أنبسطوا كدة خلاص؟ أرتحتوا؟ أنا كلمتكم عن المستويات الضعيفة اللي بنخوضها في المباريات الودية وأن دة أولا ميحصش وثانيا مش مفيد".
وتابع: "امبارح تونس كانت بتلاعب البرازيل؛ وبالمناسبة تونس خسرت من البرازيل 5-1 والمباراة شهدت ظروف وطرد لاعب من تونس؛ واحنا كسبنا ليبريا تلاتة تفتكروا مين فينا اللي استفاد أكتر أحنا ولا تونس؟ قولا واحدا منتخب تونس هو اللي استفاد وأي حد بيفهم في الكورة عارف أن الاحتكاك بالمدارس القوية هي اللي فيها افادة وتحدي وثقل لمعادن اللاعبين".
وأكمل: "هو أنا أعرف اللاعب اللي معايا قوي ازاي من غير ما أحطه في اختبار قوي يبقي هو الطرف الأضعف فيه ومحدش يقولي أن دة أول ماتشات لفيتوريا فكان لازم نلعب ماتشات ضعيفة عشان يتعرف على اللاعبين؛ مهو دة تعرف خادع ياسادة؛ لما تلاقي اللاعيبة في احتكاك سهل زي دة ما طبيعي كلهم هيتألقوا مانت بتلاعب فرق تكتيكيا ومهاريا أقل منك؛ أنت جايب حد تتعلم عليه الضرب".
وأوضح: "أنا بقولهم انبسطوا فسحتوا الولاد وبسطوا الولاد؛ وكوكا جاب جول مرموش جاب جول وكله فرح وانبسط والأتوبيس عدى على فرغلي شرب فخفخينا وهو مروح؛ أنا في رأيي المتواضع أن دة نهاية الهزار إذا كنتوا عايزين تبصوا لمرحلة جديدة لمنتخب مصر؛ كل كلامي ملوش علاقة بالمدرب؛ دا مدرب محترم وسيرته الذاتية محترمة جدا".
واختتم: "محدش يقولي ماهو الاتحاد متفق على مباراة قوية وهي منتخب بلجيكا؛ أقولك لا دا المنتخب البلجيكي هو اللي عايز يلاعب فرقة أفريقية زي اللي هيلاعبها في كأس العالم".
