عمرو أديب: "أنا خايف أموت من الحفلة اللي هتتعمل عليا"
عبر الإعلامي عمرو أديب عن استيائه من تناول
البعض على وسائل التواصل الاجتماعي لوفاة الفنان هشام سليم والحديث عن علاقة
الراحل بعائلته.
وقال أديب خلال برنامج "الحكاية"
المذاع على قناة "أم بي سي مصر": عندي لحضراتكم طلب والطلب دة أخرة
علامة تعجب هو أحنا ليه مش بنسيب الناس تموت في سلام؛ أنا مفتكرش السنتين التلاتة
اللي فاتو حد مات وسبناه في حاله يموت؛ كان مريض ومات في أي حاجة في كدة؟".
وأضاف: "احنا مبنسبش حد يموت في سلام؛
قول الله يرحمه ونقطة؛ هو وأهله عندهم مصيبة أكبر من كدة؟ أنتو اجرالكم أيه الراجل
اللي مات الحكم عليه هيفيد في ايه".
وتابع: "ماذا سيضيف حكمك على أنسان مات؛
عن هشام سليم أتحدث؛ لا كان عنده مشاكل مع عيلته لا دا ولاده كان عندهم مشاكل
معاه؛ أنت مال أهلك؟ أنت تعرف مشاكله كانت ايه؟ هشام سليم مات وسط أهله والراجل
كان عيان بقاله سنتين".
وواصل: "أنا فاهم أنه لما مبنسبش
الأحياء ماشي ولكن أنت فارق معاك أيه أن عنده مشكلة مع اخواته أو مع عياله أنت
مالك؟ أنا بقيت خايف أموت والله".
وأوضح: "هتعملوا فيا أيه لما أموت أنا
بقي؟ هيتعملي حفلة غير طبيعية؛ أنا مش عايز أموت مش خوفا من الموت عشان اللي أنتوا
بتعملوه دة؛ الراجل مات وسط أهله بس المعلومة دي مفيدة عندك في ايه؟".
وأكمل: "دا راجل كان حبيبكم دا أبن صالح
سليم كمان الموضوع الكبير كله وعيله محترمة وراجل محترم وأخواته مين ونسايبة مين؛
يا جماعة لو سمحتم لما أموت قولوا الله يرحمه أنا عارف هيتعمل معايا واجب واجب".
واختتم: "اللي بيموت دة الكلام دة هيلزق
فيه؟ دا في مكان تاني؛ دا في إيد الرحمن الرحيم ياعالم يا ظلمة؛ أنتوا ليه بقيتوا
كدة أنتوا إيه اللي جرالكم".
