«عايزها تنعم بحياتها».. مظهر شاهين يكشف أسباب رفض ارتداء ابنته الحجاب
كشف الشيخ مظهر شاهين، الداعية الإسلامي، أنه يرفض أن ترتدي ابنته الحجاب في هذا العمر، حيث تبلغ (9 أعوام)، مبينًا أنه يريدها أن تنعم بحياتها وطفولتها.
وكتب شاهين، عبر حسابه الشخصي على «فيسبوك»: «أرفض إن بنتي تتحجب دلوقتي، عارفين ليه؟ احتفلنا بالأمس بعيد ميلاد ابنتي، ولأنَّي معَوِّد أولادي على المفاجآت اللي تفرحهُم، همَّا كمان بيحبوا يعملولي مفاجآت تفرحني، المُهم، بنتي قررت تعمل لي مفاجأة في اليوم ده تفرحني بيها، فكَّرِت وفكَّرِت ثم قرَّرَتْ أن ترتدي الحجاب، وبالفعل لقيتهَا حاطة إيشارب على راسها، وهي فاكرة إن دي مفاجأة حلوة هفرح بيها، إلا أنَّنِي فاجأتُها بإنِّي رافض إنها تتحجب دلوقتي».
قال شاهين: «قلتلها الحجاب جميل يا حبيبتي، وربنا بيحبُّه لكن إلبسيه لما يبقي سنك 13 سنة، أو لمَّا ماما تقولك، عشان تعيشي طفولتك وتشبعي بيها»، مؤكدا أن عمر ابنته الآن هو 9 سنوات فقط، ويرغب في جعلها تعيش وتفرح بطفولتها بدون أي قيود.
وتابع: «يوم ما تتحجب تتحجب وهي عاوزة كده وفاهمه يعني إيه حجاب، مش عشاني أنا، وسبحان الله لما أنا فكرْت وجدْت إن ربنا سبحانه وتعالي عاوز كده، ربنا عاوز الأطفال يفرحوا ويمرحوا بدون أي قيود، عشان كده رفع القلم عنهم ومش بيحاسبهم عللا أفعالهم لحد ما يوصلوا لسن البلوغ، ساعتها بيبقوا مكلَّفين وبيتحاسبوا على تصرفاتهم».
وأكمل شاهين: «يستحب تدريب الأطفال على الصلاة والحجاب والصوم وفرائض الإسلام كاملة في سن مبكرة، وذلك مع منحهم أكبر فرصة مُمكنة يعيشون بها طفولتهم، حتى لا يشعرون بالحرمان بعد التكليف».
