بكرى يناشد الحكومة بالتصدى لجشع التجار: الشكوى الآن من زيادة الأسعار
أكد الإعلامي
مصطفى بكري؛ أن المشكلة الأساسية التي يعاني منها المواطن المصري هي ارتفاع
الأسعار، مطالبا الدولة بتفعيل دور الجهات الرقابية.
وقال بكري خلال
برنامج "حقائق وأسرار" المذاع على قناة "صدى البلد": "الشكوى
الأساسية للناس هي زيادة الأسعار؛ أي تاجر النهاردة أي تحريك في الأسعار هوب زود؛
وأنا بسأل فين يا خوانا أجهزة الرقابة والناس المسؤولة عن ده".
وأضاف: "الحكومة
لازم تفعل أدواتها في كل المجالات لأن دي بلدنا ودول أهلنا وناسنا واحنا محتاجين
نطبطب عليهم ونمسك أي حد بيزود أسعار على غير الأمر المسموح بيه ويتحبس".
وتابع: "لازم
نحرص تماما على حياة كريمة للناس؛ لقمة العيش مهمة والناس عايزة الستر؛ المهندس
عايز يودي ابنه المدرسة اللي هو فيها والعامل عايز ياكل لقمة عيشه ويلاقي
المواصلات اللي بيروح بيها شغله ويدفع فاتورة الكهرباء اللي هرت الناس".
وواصل: "عشان
كدة أنا بخاطب وزير الكهرباء شوفولنا حل في الأسعار اللي طالعة نازلة احرصوا على
أمن البلد وعلى مواجهة أي تحدي ممكن يواجه البلد".
واختتم: "مع
الظروف الصعبة اللي احنا عايشنها احنا وأمل كل الناس أن مجلس النواب يناقش
استجوابات وصوته يعلى في مواجهة الحكومة واحنا محتاجين دة ونتمنى في المرحلة القادمة
ولدينا قامة دستورية كبيرة وشخصية تعرف تماما مواطن الخلل والصح؛ المستشار حنفي
الجبالي رئيس مجلس النواب".
