أحمد موسى يطالب الحكومة بمنع التعامل بالدولار للمصريين بالداخل

طالب الإعلامي أحمد موسى؛ الدولة المصرية بمنع التعامل بالدولار للمصريين بالداخل مشيرا إلى أن بعض الشركات والأندية في مصر تطالب المصريين بسداد مستحقاتهم بالعملة الأجنبية.

وقال موسى خلال برنامج "على مسؤوليتي" المذاع على قناة "صدى البلد": "في بعض الشركات أو بعض الأندية الكبرى بتبعت للناس تقولهم عايزين المستحقات بالدولار؛ هو حضرتك النهاردة بتبني عقار بالدولار؟ بيقولك دة للمتزوجين من أجنبيات؛ طيب أنا مواطن مصري أدفع بالدولار ليه".

وأضاف: "هل أنت النهاردة عايز العملة بتاعتك متبقاش موجودة؟ أنت بتدفع ايه النهاردة؟ يكون عندك سوق سوداء أو مضاربة على الدولار؟ يكون عندك انهيار للجنيه المصري وهذا أمر لابد من تدخل رئيس مجلس الوزراء ومحافظ البنك المركزي".

وتابع: "منع أي شركة مصرية أو عربية أو أجنبية أو نادي في مصر من التعامل بالدولار؛ النهاردة بتكلم عن الجنيه المصري أنت مش عايز الجنيه يروح أكتر مما هو رايح النهاردة".

وواصل: "الأمر في أيد الحكومة والبنك المركزي مينفعش أبدا وغير مسموح لأي جهة غير الدولة المصرية التعامل بالدولار؛ بعض الناس بتكلم في الاستثمار أهلا وسهلا؛ النهاردة بيجيلي دولار من برة وعايز تطلعهولي بعد كدة".

وأوضح: "صديق عزيز كان بيقضي أجازته في مصر وحاليا وصل أمريكا فوجئت بأحد الأندية الكبرى بيقوله أنه يدفع الاشتراك بالدولار عشان هو متجوز أجنبية".

وأكمل: "احنا عايزين الجنيه يروح فين؟ هل دة اجراء صح والا خاطئ أحنا عايزين نرجع السوق السوداء مرة أخرى؛ لازم بيان واضح من الحكومة ممنوع منعا باتا لا شركة مصرية ولا أجنبية تبيع بالدولار؛ المصري يدفع بالمصري".

واختتم: "النهاردة بعض الناس تقولك أنا بعت الإعلان عشان دة مواطن أجنبي لكن المواطن المصري مينفعش أقوله بالدولار؛ والخطورة الكبرى بعض الأندية الكبيرة تطالب الأعضاء من التعامل بالدولار".