أحمد موسى: الحكومة رفضت عددا من طلبات صندوق النقد الدولي
أكد الإعلامي أحمد
موسى؛ أن الحكومة المصرية رفضت عدد من طلبات صندوق النقد الدولي خلال المفاوضات
حول الحصول على حزمة تمويلية جديدة.
وقال موسى خلال
برنامج "على مسؤوليتي" المذاع على قناة "صدى البلد": "بنتكلم
على موضوع القرض من مارس الماضي والمفاوضات مع الصندوق على حزمة تمويلات جديدة؛
الصندوق كان له طلبات وخلينا نكون واضحين في هذا الأمر".
وأضاف: "بعض
الشروط الدولة كانت شايفة أنها مش هتقدر توافق عليها وكان من ضمنها فيما يتعلق
بالدعم؛ دعم المحروقات أو الخبز والصندوق بيقولك لازم تاخد إجراءات".
وتابع: "طبعا
الدولة لن تتخلى عن دعم المواطن ودعم رغيف العيش؛ الصندوق له كذا ولكن احنا عندنا
شعبنا وبلدنا؛ الحكومة رفضت رفع دعم الخبز".
وواصل: "تكلفة
رغيف الخبز 80 قرش والمواطن بيدفع 5 قروش؛ بنتكلم عن 230 مليون جنيه تكاليف دعم
رغيف الخبز يوميا؛ ورقم اتنين سعر الصرف وهو أن يكون هناك مرونة كاملة لسعر الصرف".
وأوضح: "المرونة
الكاملة أن الدولار ياخد مجراه؛ يوصل 22 يوصل أو 23 يوصل ياخد مجراه زي ماهو عايز؛
الصندوق شايف أن الجنيه هذا ليس السعر الحقيقي ليه؛ الصندوق عايز المسألة تبقي عرض
وطلب".
وأكمل: "الحاجة
التالتة بنتكلم على القروض اللي كانت مبادرات البنك المركزي بيطرحها زي دعم
السياحة أو التمويل العقاري أو المشروعات الصغيرة ومتناهية الصغر والصندوق عايز
تكون أسعار الفايدة موحدة؛ يبدو أننا في الطريق لتوقيع هذا الأتفاق".
وعن قيمة الحزمة
التمويلية قال موسى: "الأول كنا داخلين بحوالي 8-10 مليار دولار ثم بعد ذلك
بنتكلم على ما بين 3-5 مليار دولار محدش أتكلم عن 15 أو 13 مليار دولار".
واختتم: "الحكومة
المصرية لديها توافق على القرض ما بين 3-5 والأقرب ربما يكون 3 مليار دولار وهو
رقم بسيط جدا؛ هذا الرقم أنت بتصرفه في شهر في حاجتين الأكل والأدوية الموضوع مش
هو اللي هيعملنا انقاذ؛ أنت بتاخد من الصندوق قرض لأنه بيديك شهادة على وضعك الاقتصادي
وهي دي ميزة أنك تذهب للصندوق".
