كامل الوزير: "الميكروباص اللي هيطلع على الدائري هيتحاكم والتوكتوك هرميه برة الطريق"

أكد المهندس كامل الوزير؛ أن سير سيارات الميكروباص على الطريق الدائري بعد توفير البديل لن يسمح به مشيرا إلى أن المخالفين سوف يحالون إلى المحاكمة.

وقال الوزير خلال برنامج "على مسؤوليتي" المذاع على قناة "صدى البلد": "قبل ما ألزمك بشيء لازم أوجدلك البديل والميكروباص اللي هيطلع على الدائري بعد ما أوفرله البديل هيتحاكم".

وأضاف: "في توكتوك كان ماشي عكسي على الدائري؛ أنا قلت لزمايلي وأنا بمر قلتهم وقفوا هنشيل التوكتوك وننزل الولد اللي فيه ونرمي التوكتوك برة الطريق".

وتابع: "هتقولي أنت غليظ أوي أو صعب أوي؛ طيب هنعمل ايه؟ ما أحنا بننصح ومحدش بيتنصح؛ أنت ماشي في الاتجاه المعاكس ليه عشان حد يخبطك وتموت وتطلع الدولة غلطانة".

وأكمل: "اللي هيعمل كدة هيتحاكم بعد ما أكون وفرت الاتوبيس الترددي ووفرت موقف للميني باص عشان تقف فيه؛ في أسواق على الدائري وناس واقفة بتبيع".

واختتم: "هتلاقي ناس واقفة على المطلع وبتبيع؛ والنهاردة هنشوف تصميم ميدان المرج بدل ماهو دلوقت سويقة هتلاقي ميدان محترم وكوبري مشاة محترم".