بعد واقعة مدرس الفلسلفة.. تامر أمين يوجه أسئلة لوزارة التعليم

علق الإعلامي تامر أمين؛ على محاضرة الفلسفة التي أقامها أستاذ في أحد مراكز الشباب وحضرها مئات من طلاب الثانوية العامة.

وقال أمين خلال برنامج "أخر النهار" المذاع على قناة "النهار": "دة درس خصوصي؛ مراجعة نهائية في مادة الفلسفة والمنطق في الثانوية العامة وأنا مش هقول أسمه عشان متبقاش دعاية رغم أنه مش محتاج شهرة".

وأضاف: "المدرس مصور بالكاميرا بتاعته الطيارة؛ هو فرحان بنفسه وبشعبيته وقدرته على الحشد وجمع أكبر عدد ممكن من الطلبة فمجهز الكاميرا الدرون وهو اللي مصور وعامل تنويه على السوشيال ميديا".

وتابع: "داخل بالعربية بتاعته والعربية اللي وراه فيها الحرس الشخصي بتوعه تقولش رئيس وزراء أو رئيس جمهورية؛ مصور والشباب واقفين وبيحيوه".

وأوضح: "أقسم بالله لو داخل امتحانات مش هيعمل كده؛ لو داخل بطولة كأس العالم في الفلسفة والمنطق مش هيعمل كدة؛ دخل الأستاذ وادي الدرس؛ تعالوا نسأل سؤال أيه رأيكم في اللي أنتوا شفتوه دة؟ في ناس رأيها أنه مدرس شاطر وقدر يقنع الطلبة أنهم يحضروا المراجعة ويسلموله دماغهم".

وأكمل: "الانطباع اللي عندي مش أن أنا أهاجم المدرس أو انتقده؛ أنا هوجه السؤال لوزارة التربية والتعليم هل المشهد اللي شفناه دة موافق للقانون والا غير قانوني؟ هل دة يعتبر سنتر؟ يعتبر دروس خصوصية؟ لو صحيح القانون خلاص لو مخالفة للقانون يبقى اللي حصل هناك يتم محاسبته وكل حاجة شبهه".

وواصل: "في النهاية في حاجة اسمها سنتر والا مفيش؟ قانوني والا مش قانوني؟ الوزارة يقولولنا هل دة موافق والا مخالف للقانون؛ الحاجة الأساسية اللي عايز أتكلم فيها هو أنتوا ايه يخلي الطلبة يتعلقوا بهذا الرجل ويسيبوا مدرسينهم ومدرستهم ولما سألنا طلع أن الأستاذ استقال من سنة 2012-2013".

واختتم: "أنا بسأل سؤال ليه ده مش مدرس في المدرسة؟ ليه معظم الطلبة بتمشي من المدارس في شهر مارس والتلات شهور الأخيرة بيقعدوا في البيت ويحضروا مع مدرسيين في الدروس الخصوصية؛ معني كدة أنهم بيلاقوا هنا اللي مش لاقينه في مدراسهم".