عمرو أديب منتقدا بيان البنك الأهلي: أربع سطور على 22 مليون جنيه!

انتقد الإعلامي عمرو أديب بيان البنك الأهلي المصري حول الأخبار المتداولة عن سرقة موظف 22 مليون جنيه من أموال العملاء.

وقال أديب خلال برنامج "الحكاية" المذاع على قناة "أم بي سي مصر": " في خبر نزل أن في موظف في البنك الأهلي استولى على 22 مليون جنيه وهرب؛ نمرة واحد حضرتك عارف هو خد من حسابك أو حساب حد تاني أنت فلوسك مضمونة لأن فلوسك مضمونة بضمان البنك".

وأضاف: "اللي أنا استغربته أن البنك الأهلي مطلع بيان أربع سطور ومش مفهوم منه أي حاجة؛ وبعدين لقيت بعض المواقع متطوعة تقولك أيه أصل الخبر دة محصلش".

وتابع: "طيب يا جماعة اكتبولنا سطر واضح أن الكلام دة محصلش وأن أموال الناس مأمونة واحنا عارفين أنها مأمونة وأن البنك المركزي بيدعم وبيأمن وكده".

وأكمل: "انما يقولك ايه البنك الأهلي يوكد على سلامة تعاملات كافة عملائه ويرجوا التزام الدقة قبل تداول أي أخبار مغلوطة".

وواصل: "يعني ايه؟ الخبر دة موجود في 90 موقع؛ أن الواد خد الفلوس وهرب؛ مش أباحة أن في موظف حرامي؛ بيحصل ايه المشكلة مش حاجة نتكسف منها؛ أنما نطلع نقول للناس أيوه أو لا".

وأكمل: "يعني أيه؟ يعني أه ولا لا في راجل خد 22 مليون جنيه والا لا؛ ياجماعة حاولوا تبقوا شوية البيانات والحاجات اللي بتطلع دي؛ دا معناه ايه؟".

وأوضح: "البنك المركزي بيضمن كل الأموال في البنوك المصرية وعمر ما حد راح البنك وملقاش فلوس من أول ما افتتح أول بنك في مصر لغاية النهاردة".

واختتم: "البنك الأهلي مؤسسة كبيرة وأكيد فيه قسم علاقات عامة كبير؛ ويعرف يكتب بيان محترم أنما 4 سطور على 22 مليون جنيه؟ هو الموظف خد الفلوس والا لا؟ طيب جبنا الحكاية منين".