مصطفى بكري يوضح الهدف من شائعة خطف الفتيات

علق الإعلامي مصطفى بكري؛ على الشائعات التي انتشرت مؤخرا حول تخدير وخطف الفتيات في الشوارع لافتا أن الأمر ليس له أساس من الصحة.

وقال بكري خلال برنامج "حقائق وأسرار" المذاع على قناة "صدى البلد": "أحنا شايفين وبنتابع للي بتتعرض ليه مصر والبلد دي بتتعرض لحروب من كل الاتجاهات والحروب دي جزء منها حروب شائعات وأكيد تابعتوا الشائعات الفترة اللي فاتت".

وأضاف: "في ناس لها أهداف سياسية واضحة ومش عايزين البلد تقف على رجليها؛ في الساعات الماضية قالك دبوس أبرة بيخدر الفتيات وشائعات طلعت من كل حتة".

وتابع: "كلام لا أساس له من الصحة وميحصلش في بلدنا؛ في شرطة وفي جيش وفي استقرار وتسجيلات صوتية والناس تتبادلها وحاجة تخليك تقول احنا فين يا جماعة".

وأوضح: "اللي بيحصل دة له هدف واحد وهو بث الزعر والرعب في البلد وبيديلك رسالة أنه مفيش ولا أمن ولا استقرار ولا شرطة ودا طبعا ليه تأثيره في الظروف الحالية في هدف واضح ومحدد".

وأكمل: "الشائعات دي تتزامن مع شائعات كتيرة جدا عن أوضاع مستقبلية ومجتمعية وغيره وفي سكة ارتفاع الأسعار وسكة الحوار الوطني اللي ماشية في اتجاه أخر كل دة مقصود منه أن الناس تفضل في رعب وقلق".

واختتم: "الحرب الممنهجة السياسية والاقتصادية والحرب اللي تستهدف الأمن والاستقرار؛ أحيانا بتيجي فترة الناس تبقى مستهدفة فيها لما يجي دا مع حاجات على أرض الواقع وأكاذيب تستهدف الواقع والمستقبل يخلينا نقول أن في ناس شايفة أن المرحلة الحالية مرحلة أنه ينخر في جسد الوطن".