عمرو أديب عن إقالة إيهاب جلال: "هي البلد دي ملهاش صاحب؟"

علق الإعلامي عمرو أديب؛ على إعلان اتحاد الكرة إقالة إيهاب جلال؛ المدير الفني للفريق الوطني بعد مباراتين فقط خاضها مع المنتخب.

وقال أديب خلال برنامج "الحكاية" المذاع على قناة "أم بي سي مصر": "هي البلد دي ملهاش صاحب؟ جبت مدرب ولعب ماتشين وبعد ماتشين قلت أوبس؛ مش نافع نمشيه بقي أو لو في كوريا عامل نتيجة كويسة نخليه".

وأضاف: "لو رحت جبت زين الدين زيدان وبعد ماتشين اتغلبنا نمشيه بردو؟ هي منظومة كوتش؟ هو احنا كدة هو في بلد بتدار كدة ياجماعة؟ والله نستحق اللي احنا فيه".

وتابع: "أنت من الأول جايب واحد عمره ما خد دوري ولا كأس؛ عمره ما كان مدرب بطولات؛ أنتوا بتحرقوا دمنا ليه؟ أيه الفكرة ايه العظمة في كدة؟ هي البلد بتعمل كدة ياجماعة؟ فين التخطيط فين الرياضة".

وأكمل: "وبعدين يقولك أصل دة تم انتخابه؛ ماحنا عارفين الانتخابات ازاي؛ هل دة أسلوب إدارة؟ ويقولك يمكن يكسب كوريا؟ يكسب مين هو ايه أهمية ماتش كوريا".

وأوضح: "بعدين قالك أصل إيهاب كان متخانق مع محمد شوقي وبعدين في خناقة مع اللاعيبة؟ هو في كدة؟ دي خرابة مشينا إيهاب جلال طيب وبعدين؟ في كان مدرب مسك المنتخب المصري في قد ايه وبعدين في الاخر بعد دة كله يقولك اللاعيب عندنا في المنتخب مبيعرفش يسلم ويستلم".

واختتم: "وبعدين يقولك نجيب كابتن حسام حسن؛ طيب حسام حسن هتجيبه ليه لا أصل حسام كويس؛ وبعدين هو احنا بندور على مدرب قاعد على القهوة؟ أي حد معدي يقول أي حاجة تمشي".