أحمد موسى يسأل الكاف: أنتم عايزين إية من الأهلي؟
أكد الإعلامي أحمد موسى، أن الاتحاد الأفريقي لكرة القدم يخلق أزمة قبل ساعات من نهائي دوري أبطال أفريقيا بالحديث حول استكمال اللقاء حال تعطل تقنية الفار.
وقال خلال برنامج "على مسؤوليتي" المذاع على قناة "صدى البلد": "عايزين يدوا البطولة للوداد؛ طيب من الأول قولوا الحكاية دي، والاتحاد الأفريقي كل يوم يضع نفسه أمام أزمة جديدة، ويقولك إذا تعطل الفار هنكمل المباراة".
وأضاف: "اشمعنا الفار يتعطل بكرة؟، جايز تلاقي الفار تعطل أمتى؟، في ضربة جزاء للأهلي أو الوداد يسجل هدف من تسلل مثلًا يعني؛ ولا عشان الحكم فيكتور جوميز قوي جدًا يتبقى موضوع الفار بقي نظبط الموضوع".
وذكر: "احنا مشفناش كدة؛ الفار بيلعب في عبنا من بدري من ساعة ما حددوا النهائي في بلد لها فريق في البطولة، ولما كانوا بيفكروا في بكاري جاساما؛ ولما الموضوع انكشف قالوا نعمل حد تاني؛ الفار هنعمل فيه أية معندناش فار احتياطي".
وأوضح: "يا اتحاد يا أفريقي أنتوا عايزين أية من الأخر، عايزين المباراة يكون فيه أزمة، ولا عايزين بصراحة كدة تهدي البطولة للوداد، ولكن الأهلي لا يعنيه بالمناسبة وسوف يكافح حتى أخر ثانية ورجالتنا يؤدوا ما عليهم ولو رجعوا بالبطولة هتبقى أصعب بطولة".
واختتم: "الأهلي معندوش مشكلة يلعب قدام 100 ألف ونص بطولات الأهلي جايبها من برة مش من جوة؛ معندناش مشكلة ولا قلق ولكن أنا عايز العدالة فقط لا شيء؛ الاتحاد الأفريقي بيعمل أزمة من لا شيء".
