أحمد موسى: مستريح أسوان؟ محدش بيتعظ

علق الإعلامي أحمد موسى؛ على القضية المعروفة إعلاميا باسم "مستريح أسوان" والذي جمع مئات الملايين من المواطنين بغرض النصب.

وقال موسى خلال برنامج "على مسؤوليتي" المذاع على قناة "صدى البلد": "دا جايب مكن بيعد بيه الفلوس دا عامل نفسه بنك؛ نصب على الناس الطيبة والغلابة".

وأضاف: "أنا معرفش المواطن اللي رايح باع أرضه وخيره ورايح لنصاب؛ في الأخر نصاب بيعد وعنده شلة موظفين ومكاتب؛ حول البيت لمقر؛ هو ايه الجشع دة هو محدش النهاردة بيتوب والا بيتعظ؟ أحمد مكي في رمضان؛ مسلسل الكبير أوي لسة خلصان أهو كأنه كان شايف اللي حاصل".

وتابع: "معظم قرى الصعيد فيها الكلام دة؛ فيها الناس اللي بتاخد فلوسك وتقولك هرجعهالك بعد شوية؛ دلوقت الطمع؛ بيدور على ربح عالي وهو استسهال".

وأوضح: "واحد قاعد حاطط رجل على رجل وباع كل اللي وراه واللي قدامه وراح اداهم للنصاب دة ومستني تجيله فلوس؛ هتجيله مرة وحدة وميكررهاش تاني".

وأكمل: "مصطفى دا كان بيجيله وسايط عشان ياخد فلوس الناس؛ وفي ناس بتقول عنده 300-400 راس ماشية وبيتكلم باسم الدين عشان الناس تقولك أه؛ تفتكروا لو الدولة والأمن راح قبض عليه وهو بيشتغل تفتكروا رد الناس كان هيقول ايه؛ كانوا هيقولوا بيحاربوا الناس الشاطرة الناس اللي بتشتغل".

واختتم: "لو تحركوا مبكرا زي الناس ما بتقول؛ كانوا هيقلوا رايحين ياخدوا فلوسه ورايحين يتقاسموا معاه كان هيطلع الكلام كدة".