إبراهيم عيسى للحكومة: "ما تسيبوا الناس تغني مش مستحملين أغنية" على تيك توك؟

علق الإعلامي إبراهيم عيسى على القاء القبض على ثلاثة من حراس العقارات الذين نشروا مقطع مصور على تطبيق "تيك توك" يسخرون خلاله من ارتفاع الأسعار.

وقال عيسى خلال برنامج "حديث القاهرة" المذاع على قناة "القاهرة والناس": "أنا مستغرب ومندهش؛ هو أية اللي يضايق ناس بالفطرة وجمال أوي وغنوا أغنية اتريق فيها الفنان أكرم حسني عام 2017 على ارتفاع الأسعار وهما بيرقصوا والاغنية شغالة بالأداء الساخر".

وأضاف: "ايه اللي يؤذي مصر؛ ليه ليه الحكومة المصرية تعمل كدة؛ هما خرجوا طبعا دلوقت لكن فكرة القبض عليهم أو بلاغ ضدهم أو استدعائهم للتحقيق ايه المبرر؟".

وتابع: "سيبك من الفضيحة الدولية؛ بالنسبالنا احنا كمصريين نسأل الحكومة والأجهزة الأمنية اية اللي حصل يعني متسيبوا الناس تغني".

وأكمل: "مش فاهم تيك توك بقي حزب سياسي عند الأجهزة الأمنية أو أنهم يقبضوا على بنت طالعة ترقص وتغني؛ ليه متسيبوا الناس تغني وتقول اللي هي عايزاه".

واوضح: "دا حتى على سبيل التنفيس؛ اية المعضلة الجبارة؛ المسؤول اللي بيفكر في حكاية ازاي نعاقب العيال اللي بتغني دي ليه؟".