الديهي يهاجم بيان الحركة المدنية بشأن الحوار الوطني: "محدش يتشرط على الدولة"

انتقد الإعلامي نشأت الديهي؛ إعلان الحركة المدنية الديموقراطية شروطا من أجل قبول الحوار السياسي الذي دعا إليه الرئيس عبد الفتاح السيسي.

وقال الديهي خلال برنامج "بالورقة والقلم" المذاع على قناة "تن": "أنا كأحد مواطني الدولة أنأى بنفسي أن الدولة حد يتشرط عليها من أبنائها؛ يعني إيه يتشرط أنت بتزايد عشان مكاسب داخلية".

وأضاف: "هما بيقولوا كلام أتفق مع بعضه أرفض بعضه أنا حر في رأيي؛ هما شايفين أن الحوار اللي دعا إليه الرئيس هو حوار بين السلطة والمعارضة؛ أنا بقولك أنت مش فاهم دا مش حوار بين السلطة والمعارضة ولا حوار بين أحزاب أو حقوقيين دا حوار سياسي شامل راقي حول الدولة ومستقبلها".

وتابع: "أنت بأمارة إيه؟ انت سقطت في الانتخابات أنا بقول بشكل واضح مين يفرض شروطه على الدولة؛ معارضة ايه أنت دخلت خدت 50% من أصوات الناخبين ومقاعد برلمانية عشان تقولي تتشرط؟".

وأوضح: "بقول تاني أنتوا كلكم السبعة اللي عاملين بيان؛ عاملين شوية شروط واقتراحات؛ أعتقد أن كلمة شروط أصلا كلمة بتقفل الباب؛ الحوار بين مختلفين بين أراء؛ القضية مش مصالحة" متابعا: "أن الأوان لإجراء حوار سياسي شامل وبتقولي أنا مش قاعد معاك إلا لما تعملي كذا وكذا؛ وأديني حته من التورته".

وذكر: "أنا مستاء جدا على المستوى الشخصي؛ هو الكلام دة لمين؛ أنت بتوصل الكلام دة لمين للدولة؟ طيب أبعت جواب للدولة وقولهم عايز كذا وكذا؛ لكن أنت مطلع بيان؛ عايز تزنق الدولة لا الدولة مبتتزنقش".

واختتم: "بقول تاني دي فرصة لأن الرئيس صادق في هذه الدعوة طلعوا حلول بجد لازم نبدأ بدون إبطاء دي دولة وناس وأزمات اقتصادية عندي بلاوي".